میگنم آئس کریم کمپنی پاکستان لمیٹڈ (میگنم پاکستان) کا قیام رواں سال کے آغاز میں یونی لیور گروپ سے عالمی عطح پر علیحدگی کے بعد عمل میں آیا ہے۔ آئس کریم ڈویژن گزشتہ 3 دہائیوں سے پاکستانی صارفین کی خدمت کر رہا ہے تاہم یونی لیور پاکستان سے علیحدگی کے بعد اب اس شعبے پر مزید توجہ اور یکسوئی ممکن ہو سکے گی۔

میگنم آئس کریم کمپنی پاکستان مینوفیکچرنگ صلاحیت میں توسیع، کولڈ چین انفرااسٹرکچر کو مضبوط بنانے اور ڈیجیٹل صلاحیتوں کو فروغ دینے میں سرمایہ کاری کا ارادہ رکھتی ہے۔ پاکستان میں یہ سرمایہ کاری آئندہ برسوں میں روزگار کے مزید مواقع پیدا کرے گی اور معاشی ترقی و پائیداری کے لیے کمپنی کے عزم کو مزید مضبوط بنائے گی۔

میگنم پاکستان کے کنٹری جنرل منیجر Kayhan Zenginoglu نے کہا ہے کہ یہ لمحہ میگنم پاکستان کے لیے ایک سنگ میل ہے۔ ہم جرات مندانہ جدت، عالمی معیار کے مطابق اور صارفین کو سمجھتے ہوئے فروزن ڈیزرٹس اور آئس کریم کے شعبے میں قیادت کے لیے یہاں موجود ہیں۔

انہوں نے کہا کہ کمپنی سالانہ لاکھوں لیٹر آئس کریم تیار کرتی ہے اور آئندہ چند ماہ میں پیداوار میں اضافے کی توقع رکھتی ہے۔ اس مضبوط بنیاد کو مدنظر رکھتے ہوئے میگنم پاکستان نے پریمیم مصنوعات کی مارکیٹ میں رسائی اور صارفین کے تجربات میں بہتری کے ذریعے ترقی کی رفتار تیز کرنے کے لیے جامع منصوبے بنائے ہیں۔