پی آئی اے ایچ سی ایل نے بدھ کو پاکستان اسٹاک ایکسچینج (پی ایس ایکس) کو جاری کردہ نوٹس میں اس پیش رفت سے آگاہ کیا۔

منظور شدہ اسکیم کے تحت پی ای سی کے تمام اثاثے، واجبات، معاہدے اور ملازمین یکم مئی 2025 سے پی ای سی پی ایل کو منتقل کر دیے گئے ہیں۔ پی ای سی پی ایل پی آئی اے ایچ سی ایل کے پی ای سی بزنس یونٹ سے وابستہ 259 ریٹائرڈ ملازمین کی 2.9 ارب روپے کی پنشن ذمہ داریاں اور 251 موجودہ ملازمین کی مستقبل کی پنشن و پروویڈنٹ فنڈ کی 1.1 ارب روپے کی ذمہ داریاں بھی سنبھالے گی۔

پی ای سی کے تمام ملازمین کے لیے ملازمت کی شرائط و ضوابط پی آئی اے ایچ سی ایل کے تحت پہلے سے لاگو اصولوں کے مطابق برقرار رہیں گے۔

اکتوبر میں اس سے قبل پی آئی اے ایچ سی ایل نے پی ای سی کو پاکستان ایئر فورس (پی اے ایف) کی ملکیت میں قائم ایک نئی کمپنی کو منتقل کرنے کی منظوری دی تھی جس کے ذریعے حکومت سے منظور شدہ تنظیمِ نو کے منصوبے کے تحت اس علیحدگی (کارو آؤٹ) کو باضابطہ شکل دی گئی۔

پاکستان انٹرنیشنل ایئرلائنز (پی آئی اے) کا پریسیژن انجینئرنگ کمپلیکس (پی ای سی) ہوابازی کی صنعت اور دیگر شعبوں کے لیے اعلیٰ معیار کے پرزہ جات تیار کرتا ہے۔

پی ای سی ایک مربوط صنعتی سہولت ہے جہاں ایک ہی چھت تلے انجینئرنگ کے بڑے شعبے موجود ہیں، جن میں انویسٹمنٹ کاسٹنگ، روایتی اور سی این سی مشیننگ، آپٹکس، پی سی بی، الیکٹریکل، الیکٹرانکس اور کمپوزٹس شامل ہیں۔

پی ای سی امریکا اور یورپ کو سپلائی فراہم کرتا ہے اور جنرل الیکٹرک، ایئربس انڈسٹریز اور بوئنگ جیسی عالمی کمپنیوں کو اپنی خدمات دیتا ہے۔