یہ پیش رفت وزیرِ تجارت جام کمال اور یمن کے سفیر محمد مطہر الاشعبی کے درمیان اسلام آباد میں ہونے والی اعلیٰ سطح ملاقات کے دوران سامنے آئی۔

ملاقات کے دوران سفیر محمد مطہر الاشعبی نے دونوں ممالک کے تاریخی تعلقات کو اجاگر کیا اور پاکستان کے ساتھ تجارتی رابطوں کو بڑھانے کی یمن کی خواہش پر زور دیا۔

انہوں نے کہا کہ حالیہ سالوں میں لاجسٹک اور علاقائی چیلنجز کے باوجود یمن پاکستان کو ایک قابل اعتماد شراکت دار کے طور پر قدر کی نگاہ سے دیکھتا ہے۔

انہوں نے بتایا کہ اس وقت تقریباً 300 یمنی طلبہ پاکستان میں زیرتعلیم ہیں جو دونوں ملکوں کے مضبوط عوامی روابط کی واضح مثال ہے۔
انہوں نے موجودہ دو طرفہ معاہدوں کو دوبارہ فعال کرنے اور تجارتی عمل کو آسان بنانے کے لیے ادارہ جاتی نظام کو مضبوط کرنے کی ضرورت پر زور دیا۔

جام کمال خان نے یمن کے ساتھ اقتصادی تعاون کو گہرا کرنے کے لیے پاکستان کی عزم کا اعادہ کیا اور کہا کہ پاکستان علاقائی اور قریبی مارکیٹس کے ساتھ تجارت کو وسعت دینے کو اعلیٰ ترجیح دیتا ہے۔

جام کمال نے ایس ایم ایز کے لیے موثر اور کم لاگت والے لاجسٹکس چینلز بنانے کی اہمیت کو اجاگر کیا۔الاشعبی نے بتایا کہ وزارت علاقائی تجارت کے لیے فریٹ کی لاگت کو کم کرنے اور آمد و رفت کے وقت کو بہتر بنانے کے لیے فیری پر مبنی چھوٹی شپنگ خدمات متعارف کرانے کا جائزہ لے رہی ہے۔

وزیر نے نوٹ کیا کہ پاکستان کے بڑھتے ہوئے کاروباری اور چھوٹے و درمیانے کاروبار کے شعبے یمن، صومالیہ، ایتھوپیا اور عمان جیسے قریبی مارکیٹس تک بہتر رسائی سے بہت فائدہ اٹھا سکتے ہیں۔

انہوں نے یقین دہانی کرائی کہ پاکستان ادارہ جاتی تجاویز پر عمل کرے گا اور دو طرفہ تعاون کو مضبوط بنانے کے لیے متعلقہ پلیٹ فارمز سے رابطے میں رہے گا۔

دونوں جانب نے اعتماد ظاہر کیا کہ مسلسل مکالمہ، بہتر لاجسٹکس اور باقاعدہ تعاون کے نظام کی بحالی پاکستان اور یمن کے درمیان تجارت اور سرمایہ کاری کے نئے مواقع پیدا کرنے میں مدد دے گی۔