اجلاس کے دوران اراکین نے عوامی مالیات، شفافیت اور اقتصادی نظم و نسق سے متعلق امور پر بھرپور پارلیمانی نگرانی کا عزم ظاہر کیا۔ چیئرمین کمیٹی سید نوید قمر ایف بی آر کے ممبر لیگل کے جواب سے غیر مطمئن دکھائی دیے۔ کمیٹی نے مشورہ دیا کہ متنازع شق کا دوبارہ جائزہ لے کر دو سے تین ایسے قابل عمل متبادل پیش کیے جائیں جو شفافیت کو یقینی بنائیں اور اختیارات کے بے جا استعمال کی گنجائش ختم کریں۔ وزارت خزانہ کے حکام نے اس عمل کو نظرثانی کے لیے دوبارہ پرکھنے پر اتفاق کیا۔ بل کے دیگر نکات پر اتفاق رائے کے بعد فیصلہ کیا گیا کہ اس کی مزید کارروائی آئندہ 9 دسمبر کو ہونے والے اجلاس میں کی جائے گی۔

کمیٹی نے دی نیٹنگ آف فنانشل ارینجمنٹس بل 2025 کا جائزہ بھی آئندہ اجلاس تک مؤخر کر دیا۔ اسی طرح چیئرمین پی ٹی اے اور چیئرمین ایف بی آر کی طرف سے بیرون ملک سے نئے اور استعمال شدہ موبائل فون لانے کے ضوابط، ٹیکسیشن اور ویلیوایشن پر بریفنگ بھی اگلے اجلاس کے لیے موخر کر دی گئی۔

اجلاس میں آئی ایم ایف کی گورننس رپورٹ کا تفصیلی جائزہ لیا گیا اور کمیٹی نے اس بات کی نشاندہی کی کہ مجوزہ اصلاحات اور موجودہ حکومتی طرزِ عمل میں بڑا فرق موجود ہے۔ چیئرمین نے رپورٹ کی اس سفارش کی جانب توجہ دلائی کہ دورانِ سال بجٹ میں تبدیلیاں پارلیمانی منظوری کے بغیر نہ کی جائیں۔ کمیٹی نے زور دیا کہ حکومت بعد از منظوری کے بجائے پیشگی منظوری کا نظام اپنائے، یا کم از کم سہ ماہی بنیاد پر ایسی تبدیلیاں ایوان میں پیش کرے، البتہ جنگ یا ہنگامی حالات میں محدود رعایت دی جا سکتی ہے۔

معیشت کی ڈیجیٹلائزیشن سے متعلق سفارشات پر کمیٹی نے کہا کہ انٹرنیٹ شٹ ڈاؤن جیسے مسائل مکمل کیش لیس نظام کو متاثر کر سکتے ہیں، اس لیے حکومت بتدریج اور احتیاط کے ساتھ آگے بڑھے۔ کمیٹی نے ہائبرڈ نظام اپنانے پر زور دیا تاکہ کسی بھی ڈیجیٹل رکاوٹ کی صورت میں معاشی سرگرمی متاثر نہ ہو۔ وزیر خزانہ نے یقین دلایا کہ حکومت ان چیلنجز سے آگاہ ہے اور قانون سازی کے عمل میں پارلیمنٹ سے قریبی تعاون جاری رکھا جائے گا۔

اجلاس میں کارپوریٹ سوشل ریسپانسبیلٹی بل 2025 پر بھی غور کیا گیا، جسے ڈاکٹر نفیسہ شاہ نے پیش کیا تھا۔ کمیٹی نے وزارت قانون کو ہدایت دی کہ طے شدہ نکات کو بل میں شامل کر کے اسے آئندہ اجلاس میں دوبارہ پیش کیا جائے۔

کاپی رائٹ بزنس ریکارڈر، 2025