وفاقی وزیر تجارت جام کمال خان نے قاہرہ میں ڈی 8 وزرائے تجارت کونسل کے چوتھے اجلاس سے خطاب میں کہا کہ پی ٹی اے علاقائی تجارت کا بنیادی محرک ہے اور اس پر موثر عملدرآمد اس کے حقیقی فوائد حاصل کرنے کے لیے ناگزیر ہے۔

انہوں نے کہا کہ پاکستان طریقہ کار میں ہم آہنگی، عملی چیلنجوں کے حل اور دستاویزات کے نظام کو بہتر بنا کر معاہدے کو فعال بنانے کے لیے پرعزم ہے۔

ڈی-8 میں بنگلہ دیش، مصر، انڈونیشیا، ایران، ملائیشیا، نائجیریا، پاکستان اور ترکیہ شامل ہیں، جو ترقی پذیر معیشتوں کا ایک اہم تجارتی پلیٹ فارم ہے۔

اجلاس میں وفاقی وزیر نے ڈی-8 کے تنازعات کے حل کے پروٹوکول پر دستخط بھی کیے، جسے تنظیمی مضبوطی کی جانب اہم قدم قرار دیا گیا۔ اس سے رکن ممالک کے درمیان تجارت میں مزید آسانی اور اقتصادی انضمام کو فروغ ملنے کی توقع ہے۔

جام کمال خان نے کہا کہ بدلتے عالمی معاشی حالات کے پیش نظر ڈی-8 کو سپلائی چین میں رکاوٹوں، تحفظ پسندی اور مارکیٹ اتار چڑھاؤ جیسے چیلنجوں کا مشترکہ طور پر مقابلہ کرنا ہوگا۔انہوں نے کسٹمز، معیار بندی، لاجسٹک رابطوں، ڈیجیٹل تجارت اور نجی شعبے کی شمولیت کو علاقائی تعاون کے فروغ کے لیے ضروری قرار دیا۔

آخر میں انہوں نے یقین ظاہر کیا کہ ڈی-8 میں مربوط کوششیں مشترکہ خوشحالی اور علاقائی انضمام کی راہ ہموار کرے گی۔