اکتوبر 2025 میں صارف قیمت اشاریہ (سی پی آئی) 6.2 فیصد رہا جبکہ نومبر 2024 میں یہ 4.9 فیصد تھا۔ ماہانہ بنیاد پر نومبر 2025 میں مہنگائی میں 0.4 فیصد اضافہ ہوا جو گزشتہ ماہ کے 1.8 فیصد اور نومبر 2024 کے 0.5 فیصد سے کم ہے۔

مالی سال 2025-26 کے پہلے پانچ ماہ (جولائی تا نومبر) کے دوران مہنگائی کی اوسط شرح 5.01 فیصد رہی جو پچھلے سال کے 7.88 فیصد سے کم ہے۔

شہری علاقوں میں سی پی آئی مہنگائی نومبر 2025 میں سالانہ بنیاد پر 6.1 فیصد رہی جبکہ دیہی علاقوں میں 6.3 فیصد ریکارڈ کی گئی۔ دیہی علاقوں میں ماہانہ مہنگائی صرف 0.2 فیصد رہی جو گزشتہ ماہ کے 2.3 فیصد اور پچھلے سال کے 0.5 فیصد سے کم ہے۔

وزارت خزانہ نے اپنی ماہانہ رپورٹ میں کہا کہ نومبر میں مہنگائی 5 سے 6 فیصد کے دائرے میں رہنے کا امکان ہے جس کی وجہ خوراک کی قیمتوں اور زرعی پیداوار پر دباؤ ہے۔

تاہم بروکریج ہاؤسز نے مہنگائی کے بڑھنے کا امکان ظاہر کیا ہے۔ ٹاپ لائن سیکیورٹیز نے پیش گوئی کی ہے کہ سالانہ مہنگائی 6.5 سے 7 فیصد تک پہنچ سکتی ہے جس کی وجہ غذائی سپلائی میں رکاوٹیں اور توانائی کی قیمتوں میں اضافہ ہے۔ جے ایس گلوبل نے بھی نوٹ کیا کہ خوراک کی قیمتوں میں اضافے کے سبب سالانہ مہنگائی 6.3 فیصد تک جاسکتی ہے۔

گزشتہ ہفتے گورنر اسٹیٹ بینک جمیل احمد نے کہا کہ مہنگائی مرکزی بینک کی پیش گوئیوں کے مطابق ہے اور درمیانی مدت میں 5 سے 7 فیصد کے ہدف کے اندر رہنے کی توقع ہے۔