سماجی رابطے کی ویب سائٹ ایکس پر جاری اپنے بیان میں انہوں نے بتایا کہ وہ اسلام آباد ایئرپورٹ کے اچانک دورے کے دوران بیرونِ ملک روانہ ہونے والے مسافروں سے ملے اور ان کے مسائل براہِ راست سنے۔

وزیر داخلہ نے امیگریشن پر عملے کی کمی سے متعلق ایک مسافر کی شکایت کا سخت نوٹس لیتے ہوئے فوری انکوائری کا حکم دیا اور متعلقہ سی سی ٹی وی فوٹیجز کا جائزہ لینے کی ہدایات جاری کیں۔

محسن نقوی نے واضح کیا کہ جس مسافر کے پاس مکمل اور مستند سفری دستاویزات ہوں، اسے ہرگز نہیں روکا جائے گا لیکن جعلی یا غیر مصدقہ کاغذات پر سفر کی کوشش کرنے والوں کو کسی صورت اجازت نہیں دی جائے گی، کیونکہ ایسے اقدامات پاکستان کی ساکھ کو نقصان پہنچاتے ہیں۔

گزشتہ دنوں سوشل میڈیا پر گردش کرنے والے دعوؤں کے پس منظر میں 27 نومبر کو ایف آئی اے نے بھی واضح کیا تھا کہ بلاجواز مسافروں کو طیاروں سے اتارنے کے الزامات من گھڑت اور گمراہ کن ہیں، جن کا مقصد عوام میں بے جا تشویش پیدا کرنا ہے۔ ادارے نے کہا کہ مکمل دستاویزات اور جائز سفر کی غرض رکھنے والے کسی بھی مسافر کو نہیں روکا جاتا، جبکہ مسافروں کا تحفظ اس کی اولین ترجیح ہے۔

ایف آئی اے نے شہریوں پر زور دیا کہ وہ غیر قانونی ایجنٹوں کے جھانسے میں نہ آئیں اور صرف مکمل، مستند اور تصدیق شدہ دستاویزات کے ساتھ ہی سفر کریں۔

ادھر وفاقی وزیر برائے اوورسیز پاکستانیز چوہدری سالک حسین نے بھی ایف آئی اے کو بیرونِ ملک جانے والے ملازمین کو ایئرپورٹ پر بلاوجہ طیاروں سے اتارنے کی شکایات فوری حل کرنے کی ہدایت کی تھی۔