کاروبار کے اختتام پر ڈالر کے مقابلے میں روپیہ ایک پیسے کی بہتری سے 280.55 روپے پر جاپہنچا۔

یاد رہے کہ بدھ کو مقامی کرنسی 280.56 روپے پر بند ہوئی تھی۔

عالمی سطح پر جمعرات کو امریکی ڈالر دباؤ میں رہا کیونکہ تھینکس گیونگ کی امریکی تعطیل سے قبل ٹریڈنگ کا حجم کم تھا اور سرمایہ کار آئندہ سال پر نظر جمائے ہوئے ہیں جہاں امریکی شرح سود میں کٹوتیوں کا ایک سلسلہ طے شدہ ہے۔

ین 0.4 فیصد مضبوط ہو کر فی ڈالر 155.87 پر آ گیا جبکہ یورو صبح کی ٹریڈنگ میں 1.16 ڈالر سے اوپر پہنچ گیا۔

نیوزی لینڈ کا ڈالر بھی تیزی سے ابھرا اور مرکزی بینک کے سخت لہجے اور مضبوط معاشی اعداد و شمار کے بعد 0.5714 ڈالر کی تین ہفتوں کی بلند ترین سطح پر پہنچ گیا۔

آسٹریلین ڈالر بھی مضبوطی دکھا رہا ہے کیونکہ بدھ کو توقع سے زیادہ مہنگائی کے اعداد و شمار نے اس امکان کو مزید تقویت دی کہ وہاں شرحِ سود میں نرمی کا سلسلہ ختم ہو چکا ہے۔

آسٹریلیا کی 10 سالہ بانڈ ییلڈ 4.48 فیصد جی-10 ممالک میں سب سے زیادہ ہے، جس کی وجہ سے ماہرین کے مطابق آسٹریلین کرنسی اب بھی سستی دکھائی دیتی ہے۔

0.6526 ڈالر پر آسٹریلین ڈالر اس چینل کے وسط میں ہے جس میں وہ تقریباً 18 ماہ سے ٹریڈ ہو رہا ہے۔

اسٹرلنگ بھی معمولی بڑھ کر اکتوبر کے آخر کے بعد کی بلند ترین سطح 1.3256 ڈالر پر پہنچ گئی اور یہ اگست کے بعد ہفتہ وار بنیاد پر سب سے زیادہ اضافہ ریکارڈ کرنے کی طرف بڑھ رہی ہے کیونکہ برطانوی بجٹ نے ملکی مالیاتی صورتحال سے متعلق کچھ خدشات کم کیے ہیں۔

امریکی ڈالر انڈیکس 99.433 پر مستحکم رہا جو ایک ہفتہ قبل چھ ماہ کی بلند ترین سطح سے پیچھے ہٹنے کے بعد جولائی کے بعد سب سے بڑی ہفتہ وار کمی کی جانب گامزن ہے۔