مارکیٹ میں دن بھر خریداری کا رجحان غالب رہا، ٹریڈنگ کے دوران ایک موقع پر 100 انڈیکس دن کی بلند ترین سطح 162,741.73 پوائنٹس پر جاپہنچا۔

کاروبار کے اختتام پر کے ایس ای 100 انڈیکس 1,291.14 پوائنٹس یا 0.80 فیصد اضافے سے 162,226.27 پر بند ہوا۔

یاد رہے کہ منگل کو بینچ مارک کے ایس ای 100 انڈیکس 752.05 پوائنٹس گر کر 160,935.13 پوائنٹس پر بند ہوا۔

بین الاقوامی سطح پر بدھ کو ایشیائی مارکیٹس میں پیشرفت رُکی رہی کیونکہ اے آئی ویلیوایشنز سے متعلق بے چینی نے سرمایہ کاروں کو محتاط رکھا، بالخصوص اس وقت جب این ویڈیا اپنی آمدنی کی تازہ رپورٹ جاری کرنے والا ہے۔

ٹیکنالوجی پر مبنی نیسڈیک انڈیکس راتوں رات 1.2 فیصد گرگیا جو مسلسل دوسرے دن کی مندی ہے۔

ویلیوایشن سے متعلق خدشات کی وجہ سے انڈیکس اکتوبر کے آخر میں بنائے گئے ریکارڈ کی سطح سے 6 فیصد سے زائد نیچے آ گیا ہے۔

ایس اینڈ پی 500 فیوچرز اور نیسڈیک 100 فیوچرز ایشیائی سیشن میں تقریباً بغیر تبدیلی کے ٹریڈ ہوئے۔

جاپان کا نکی 0.4 فیصد اضافے کے ساتھ قدرے غیر مستحکم رہا جبکہ جنوبی کوریا کا کوسپی 0.8 فیصد گر گیا۔

این ویڈیا کی رپورٹ اور امریکی معاشی خدشات کا عالمی منڈیوں پر اثر

این ویڈیا، جو وہ گرافکس پروسیسنگ یونٹس (جی پی یوز) فروخت کرتی ہے جو مصنوعی ذہانت کی بنیاد ہیں، اس وقت عالمی اسٹاک مارکیٹوں کی ریکارڈ بلندیاں چھونے والی ریلی کے مرکز میں ہے اور ہر اس اسٹاک کی قیمت بڑھا رہی ہے جس کا مصنوعی ذہانت سے بالواسطہ تعلق ہے۔

این ویڈیا امریکی مارکیٹ کے بند ہونے کے بعد اپنی مالی رپورٹ پیش کرے گی اور متوقع ہے کہ اپنے مالی سال کے اگست تا اکتوبر کے سہ ماہی دوران آمدنی میں 56 فیصد اضافہ کر کے 54.92 ارب ڈالر تک پہنچائے گی، جیسا کہ ایل ایس ای جی کے اعداد و شمار سے ظاہر ہوتا ہے۔

اسی دوران امریکی سود کی شرح میں دسمبر میں کمی کے حوالے سے خدشات بڑھ رہے ہیں، اور سرمایہ کار یہ بھی فکر مند ہیں کہ امریکی صدر ڈونلڈ ٹرمپ کی عوامی مقبولیت میں کمی ممکنہ طور پر مالی اخراجات میں اضافہ کر سکتی ہے اور مہنگائی کو بھڑکا سکتی ہے۔

یہ خدشات امریکی محفوظ سرمایہ کاری کے طور پر جانے والے ٹریژریز ( یو ایس ٹریژریز) کو فائدہ پہنچنے سے روک رہے ہیں، اگرچہ مارکیٹ کا موڈ کمزور ہوا ہے۔ ییلڈز رات بھر تھوڑا کم ہوئے، لیکن صرف معمولی حد تک، اور 10 سالہ بینچ مارک ییلڈ 4.11 فیصد پر مستحکم رہا۔

مارکیٹ میں اب دسمبر میں فیڈرل ریزرو کی 25 بیسس پوائنٹ شرح سود میں کمی کے امکانات تقریباً 42 فیصد پر آ گئے ہیں، جبکہ ایک ماہ قبل اسے تقریباً یقینی سمجھا جا رہا تھا۔