مارکو روبیو کینیڈا کے نیاگرا ریجن میں گروپ آف سیون کے وزرائے خارجہ کی میٹنگ میں شریک تھے، جہاں یوکرین اور غزہ کے حالات زیر بحث آئے۔ تاہم بعض ممالک نے امریکی کارروائیوں پر تحفظات کا اظہار کیا، جن میں کشتیوں کو نشانہ بنانے کا الزام شامل ہے، جن پر ٹرمپ انتظامیہ کے مطابق منشیات لے جائی جا رہی تھیں۔

فرانسیسی وزیر خارجہ جین نوئل بارت نے کہا کہ یہ کارروائیاں بین الاقوامی قوانین کی خلاف ورزی ہیں اور فرانس کے خطے کے لیے تشویش کا باعث ہیں۔ امریکی فوج نے اب تک کیریبین اور لاطینی امریکہ کے ساحلی علاقوں میں مشتبہ منشیات بردار کشتیوں پر کم از کم 19 حملے کیے، جن میں 76 افراد ہلاک ہوئے۔

مارکو روبیو نے صحافیوں سے گفتگو میں کہا کہ یورپی یونین یہ طے نہیں کر سکتی کہ بین الاقوامی قانون کیا ہے اور یہ بھی نہیں کہ امریکہ اپنی سلامتی کی حفاظت کیسے کرے۔ انہوں نے کہا کہ منشیات وینزویلا سے یورپ بھی جاتی ہیں، اس لیے امریکہ کو ان کے خاتمے پر سراہا جانا چاہیے۔

کولمبیا کے صدر گوستاوو پیٹرو نے امریکی کارروائیوں کے خلاف اپنی انٹیلی جنس شیئرنگ معطل کر دی۔ مارکو روبیو نے اس ضمن میں برطانیہ کی جانب سے اطلاعات معطل کرنے کی رپورٹ کو غلط قرار دیا اور کہا کہ امریکہ اور برطانیہ کے تعلقات مضبوط ہیں۔

میٹنگ میں یوکرین کے وزیر خارجہ نے روس پر مزید دباؤ ڈالنے اور اپنے توانائی کے شعبے کو مضبوط کرنے کی ضرورت پر زور دیا۔ گروپ آف سیون کے وزرا نے مشترکہ بیان میں فوری جنگ بندی کا مطالبہ دہرایا اور روس پر اقتصادی دباؤ بڑھانے اور اس کے مالی معاونت کرنے والے ممالک اور اداروں کے خلاف اقدامات کرنے کا اعلان کیا۔

کینیڈا کی وزیر خارجہ انیتا آنند نے روس کے ڈرون پروگرام، ایل این جی اداروں اور شیڈو فلیٹ کے جہازوں کے خلاف اضافی پابندیاں عائد کرنے کا اعلان کیا۔