طوفان فنگ وونگ، جسے مقامی طور پر اوان کہا جاتا ہے، اتوار کی شب آورا کے شہر دینالونگن میں سپر طوفان کی شدت سے زمین پر اترا۔ اس نے لوزون کے اہم جزیرے کے کئی علاقوں میں شدید بارش، تیز ہوا اور طوفانی لہروں کے ساتھ تباہی مچائی،جس کے نتیجے میں 10لاکھ لوگوں کو محفوظ مقامات پر منتقل کیا گیا ہے۔

شمالی شہر سانتیاگو، صوبہ ایسابیلا میں طوفان سے گھروں کو نقصان پہنچا جبکہ درختوں کی شاخیں اور بجلی کے کھمبے بھی گر گئے۔ مقامی رہائشی رومیو ماریانو نے بتایا کہ ہم پچھلی رات سو نہیں سکے کیونکہ دھات کی چھتوں پر ہوا کا اثر اور درختوں کی شاخیں گر رہی تھیں۔ انہوں نے مزید کہا کہ جب ہم اپنے گھر کا جائزہ لینے کے لیے باہر نکلے تو نقصان واضح تھا۔

سول ڈیفنس کے دفتر کی ابتدائی رپورٹ کے مطابق طوفان کے نتیجے میں کم از کم دو افراد ہلاک اور دو دیگر زخمی ہوئے۔ آورا کے وائس گورنر پیٹرک الیکسس انگارا نے بتایا کہ کم از کم تین قصبے لینڈ سلائیڈز اور ٹوٹے ہوئے راستوں کی وجہ سے ناقابل رسائی ہیں۔

محکمہ موسمیات کے مطابق طوفان اب ساؤتھ چائنا سی کی جانب بڑھ رہا ہے اور متوقع ہے کہ شمال مشرق کی طرف، تائیوان کی جانب منتقل ہو جائے گا۔ اس نے خبردار کیا کہ ملک کے بڑے حصے میں شدید بارش اور تیز ہوائیں جاری رہیں گی، جبکہ ساحلی علاقوں میں طوفانی لہروں کا خطرہ ہے۔

سول ایوی ایشن ریگولیٹر کے مطابق اتوار سے اب تک 400 سے زائد پروازیں منسوخ ہو چکی ہیں۔

یہ طوفان اس سال فلپائن پر آنے والا اکیسویں طوفان ہے اور یہ گزشتہ ہفتے آنے والے طوفان کلمیگی کے بعد آیا، جس نے ملک میں 224 افراد کی جانیں لیں اور ویتنام میں مزید پانچ افراد ہلاک ہوئے۔