ملاقات میں صدر پاکستان نے دفاع اور دفاعی پیداوار کے شعبوں میں تعاون کے فروغ کی پیشکش کی، جس پر امیرِ قطر نے مثبت ردِعمل دیتے ہوئے متعلقہ حکام کو پاکستان کے ساتھ فوری مشاورت شروع کرنے کی ہدایت دینے کا یقین دلایا۔ صدر زرداری نے زراعت اور غذائی تحفظ کے شعبوں میں بھی شراکت بڑھانے کی تجویز دی۔

امیرِ قطر نے پاکستان کی ترقیاتی کامیابیوں کو سراہتے ہوئے کہا کہ وہ پاکستانی برادری کے قطر کی ترقی میں کردار کو قدر کی نگاہ سے دیکھتے ہیں اور چاہتے ہیں کہ آئندہ برسوں میں ان کی تعداد میں نمایاں اضافہ ہو۔

صدر آصف زرداری نے حکومت اور عوام پاکستان کی جانب سے امیر قطر کو نیک خواہشات اور خیرسگالی کا پیغام پہنچایا اور ان کی بصیرت افروز قیادت میں قطر کی شاندار ترقی کی تعریف کی۔ دونوں رہنماؤں نے ایمان، باہمی اعتماد اور امتِ مسلمہ کی ترقی و خوشحالی کے مشترکہ مقاصد پر مبنی تاریخی اور برادرانہ تعلقات کے تسلسل پر اتفاق کیا۔

صدر آصف زرداری نے قطر کے عالمی کردار کو سراہتے ہوئے فلسطین خصوصا غزہ کے لیے جنگ بندی اور انسانی امداد کی وکالت پر امیرِ قطر کو خراج تحسین پیش کیا۔

امیرِ قطر نے پاکستان اور سعودی عرب کے حالیہ دفاعی معاہدے کو بروقت اور خوش آئند قرار دیتے ہوئے کہا کہ پاکستان ایک منفرد حیثیت رکھتا ہے جو بیک وقت چین، مغرب اور خلیجی ممالک کے ساتھ اسٹریٹجک تعلقات برقرار رکھے ہوئے ہے۔

صدر آصف زرداری نے قطر کے سرمایہ کاری کے عزم کا خیرمقدم کرتے ہوئے اعتماد ظاہر کیا کہ دوطرفہ تعاون مزید مستحکم ہوگا۔ انہوں نے قطر فاؤنڈ فار ڈیولپمنٹ اور دیگر تعلیمی و انسانی خدمات انجام دینے والی قطری شخصیات کو بھی خراجِ تحسین پیش کیا۔

صدر آصف زرداری نے امیرِ قطر کو پاکستان کے دورے کی دعوت دی، جسے انہوں نے قبول کرلیا اور کہا کہ وہ آئندہ سال کے اوائل میں پاکستان آئیں گے۔