یہ پیش رفت متوقع تھی۔ جب مالی سال 2024-25 کی چوتھی سہ ماہی کا کیو ٹی اے جاری کیا گیا تھا، تو اس وقت ہی واضح کیا گیا تھا کہ 53 ارب روپے کی منفی ایڈجسٹمنٹ جو کسی ایک سہ ماہی میں سب سے بڑی کمی تھی غالباً آخری ہو گی۔ اُس ریلیف کی بنیادی وجہ کپیسٹی چارجز میں کمی تھی، جو پانچ بجلی گھروں کی بندش اور نجی بجلی گھروں (آئی پی پیز) کے ساتھ دوبارہ طے شدہ معاہدوں کے نتیجے میں سامنے آئی تھی۔

اسی دوران نیلم جہلم ہائیڈرو پاور پلانٹ کی بندش نے عارضی طور پر کپیسٹی ادائیگیوں میں مزید کمی پیدا کی، جس سے کپیسٹی پرچیز پرائس (سی پی پی) میں مصنوعی کمی واقع ہوئی۔

یہ دور جس میں پرانے یا غیر حقیقی اندازوں کی بنیاد پر منفی کیو ٹی اے سامنے آتے رہے، بنیادی ٹیرف میں ازسرِنو تعین کے بعد ختم ہونا ہی تھا۔ اب مالی سال 2026 کی پہلی سہ ماہی کے اعداد و شمار نے اس حقیقت کی تصدیق کر دی ہے۔

پہلی سہ ماہی کے لیے 8 ارب روپے کی مجوزہ ایڈجسٹمنٹ اگرچہ معمولی ہے، مگر علامتی طور پر بہت اہم ہے۔ یہ ظاہر کرتی ہے کہ پاور پرچیز پرائس کے فریم ورک کے اندر لاگت کے ازسرِنو تعین کا عمل اب ایک حقیقت پسندانہ سطح پر مستحکم ہو چکا ہے۔

مالی سال 2025 کے وسط میں آئی پی پیز کے ساتھ ہونے والی ازسرِنو گفت و شنید جو اس وقت کے سی پی پی تخمینوں میں شامل نہیں تھی اب مالی سال 2026 کے ٹیرف ڈھانچے میں شامل کر لی گئی ہے۔ اس سے وہ گنجائش ختم ہوگئی ہے جس کے باعث ماضی میں بڑی منفی ایڈجسٹمنٹس ممکن تھیں۔

تاہم بنیادی لاگت کے دباؤ اب بھی برقرار ہیں۔ سہ ماہی کے دوران 22 ارب روپے کے کپیسٹی چارجز کی عدم وصولی ظاہر کرتی ہے کہ کم استعمال شدہ پیداواری صلاحیت کا مسئلہ ابھی حل نہیں ہوا۔ اگر آپریشن اینڈ مینٹیننس (او اینڈ ایم) اخراجات، نظام کے استعمال کی فیس، اور سہ ماہی فیول چارج ایڈجسٹمنٹ (ایف سی اے) کا متوازن اثر نہ ہوتا تو کیو ٹی اے کی رقم اس سے کہیں زیادہ ہوتی۔

تقریباً 33 ارب یونٹس کی حقیقی فروخت کی بنیاد پر، یہ کیو ٹی اے اوسطاً 0.25 روپے فی یونٹ کے قریب بنتا ہے اگر اسے سہ ماہی کے دوران یکساں طور پر لاگو کیا جائے۔

حکومت، جو ٹیرف کے سیاسی و سماجی اثرات سے بخوبی واقف ہے، ممکنہ طور پر اس ایڈجسٹمنٹ کو مرحلہ وار یا یکمشت نافذ کرنے کا فیصلہ کر سکتی ہے جیسا کہ ماضی میں صارفین پر اثر کم کرنے کے لیے کیا جاتا رہا ہے۔ تاہم، چونکہ گزشتہ منفی کیو ٹی اے یعنی 1.89 روپے فی یونٹ کی مدت اکتوبر میں ختم ہو چکی ہے، اس لیے ٹیرف میں پیدا ہونے والا فرق 2 روپے فی یونٹ سے تجاوز کر سکتا ہے، حتیٰ کہ دیگر معمول کی ایڈجسٹمنٹس کو شامل کیے بغیر بھی ایسا ہوسکتا ہے۔

عملی طور پر اس کا مطلب یہ ہے کہ صارفین کے لیے مؤثر بجلی نرخ آئندہ چھ ماہ کی بلند ترین سطح پر پہنچنے والے ہیں۔ ایک اور ماہانہ اضافہ پہلے ہی طے شدہ ہے، اور وہ ریلیف جو مالی سال 2025 کے بیشتر حصے میں حاصل رہا تھا اب ختم ہو چکا ہے۔

آئندہ سہ ماہیوں میں کیو ٹی اے زیادہ تر مثبت رہنے کی توقع ہے، اگرچہ ان میں اضافہ معمولی ہوگا، کیونکہ نیپرا کے نئے اندازے اب نظام کی عملی حقیقتوں کی بہتر عکاسی کرتے ہیں۔ تاہم اصل چیلنج ساختی نوعیت کا ہے: یعنی بجلی کی حقیقی پیداوار اور ٹیرف میں شامل ریفرنس جنریشن کے درمیان مستقل فرق۔ یہی فرق کپیسٹی ادائیگیوں کو بلند رکھتا ہے، جس سے مذاکرات اور بنیادی ٹیرف میں کمی کے اثرات محدود ہو جاتے ہیں۔

اس تناظر میں، حکومت کا روشن معیشت پروگرام جو صنعتی سرگرمیوں کے فروغ اور کھپت پر مبنی نمو کے ذریعے اضافی طلب پیدا کرنے کے لیے متعارف کرایا گیا ہے — نئی اہمیت اختیار کر گیا ہے۔ اگر دستیاب پیداواری صلاحیت کے مطابق بجلی کی طلب میں اضافہ نہ ہوا، تو یہ شعبہ دوبارہ خسارے، بڑھتے ہوئے گردشی قرضے، اور مسلسل ٹیرف ایڈجسٹمنٹس کے چکر میں پھنس سکتا ہے۔

جیسا کہ پیش گوئی کی گئی تھی کیو ٹی اے کا رجحان اب الٹ چکا ہے۔ لیکن اگر کھپت میں اضافہ اور نظام کی کارکردگی میں بہتری نہ آئی، تو یہ معمول پر واپسی جلد ہی قیمتوں کے ایک اور بڑھتے ہوئے دباؤ میں تبدیل ہو سکتی ہے جو صارفین کے صبر اور پالیسی سازوں کے عزم دونوں کا امتحان لے گی۔