آئی ایس پی آر کی جانب سے جاری بیان کے مطابق دہشت گردوں کی موجودگی کی اطلاع پر ضلع کوئٹہ کے جنرل ایریا چلتن پہاڑوں میں انٹیلی جنس پر مبنی آپریشن (آئی بی او) کیا گیا۔

آئی ایس پی آر نے کے مطابق آپریشن کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا، اور شدید فائرنگ کے تبادلے کے بعد 14 بھارتی سرپرستی یافتہ دہشت گرد ہلاک ہوگئے۔

فوج کے شعبۂ تعلقاتِ عامہ کے مطابق، ایک اور آئی بی او بلوچستان کے ضلع کیچ کے علاقے بلیدہ میں کیا گیا، جہاں ایک دہشت گرد ٹھکانے کو نشانہ بنایا گیا اور چار دہشت گرد مارے گئے۔

بیان میں مزید کہا گیا کہ ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد ہوا۔ یہ دہشت گرد مختلف تخریبی کارروائیوں میں سرگرم تھے۔

آئی ایس پی آر کے مطابق علاقے میں کلیئرنس آپریشن جاری ہیں تاکہ کسی بھی بھارتی سرپرستی یافتہ دہشت گرد کو ختم کیا جا سکے۔ سیکیورٹی فورسز اور قانون نافذ کرنے والے ادارے عزم استحکام کے وژن کے تحت انسدادِ دہشت گردی کی مہم پوری رفتار سے جاری رکھیں گے تاکہ بیرونی حمایت یافتہ دہشت گردی کے خطرے کو ملک سے مکمل طور پر ختم کیا جا سکے۔

دریں اثنا، وزیراعظم شہباز شریف نے سیکیورٹی فورسز کو خراجِ تحسین پیش کیا اور کہا کہ پوری قوم دہشت گردی کے خلاف جنگ میں اپنے بہادر محافظوں کے ساتھ کھڑی ہے۔

وزیراعظم نے کہا کہ حکومت ملک سے ہر قسم کی دہشت گردی کے مکمل خاتمے کے لیے پرعزم ہے۔

صوبائی محکمۂ داخلہ کی جاری کردہ ایک ششماہی رپورٹ کے مطابق، بلوچستان میں 2025 کے پہلے چھ ماہ کے دوران 501 دہشت گردانہ واقعات میں کم از کم 257 افراد جاں بحق ہوئے، جن میں 133 سیکیورٹی اہلکار شامل تھے۔

رپورٹ میں بتایا گیا کہ یکم جنوری سے 30 جون تک کے عرصے میں 492 افراد زخمی بھی ہوئے، جن میں 238 قانون نافذ کرنے والے اہلکار شامل ہیں، جب کہ صوبے میں پرتشدد واقعات میں نمایاں اضافہ ریکارڈ کیا گیا۔