ٹرمپ نے اپنے پہلے ایشیائی پڑاؤ کے دوران متعدد معاہدوں کی نگرانی کی، جن میں کمبوڈیا اور تھائی لینڈ کے درمیان جنگ بندی کا توسیعی معاہدہ اور چار علاقائی تجارتی معاہدے شامل تھے۔ تاہم وائٹ ہاؤس کے مطابق ان معاہدوں میں کمبوڈیا، ملائیشیا، تھائی لینڈ اور ویتنام پر عائد امریکی ٹیرف میں کوئی کمی شامل نہیں تھی، اگرچہ استثنا کے کچھ امکانات ضرور رکھے گئے۔

ٹرمپ نے کہا کہ امریکا جنوب مشرقی ایشیا کے ممالک کے ساتھ 100 فیصد کھڑا ہے اور ہم طویل المدتی شراکت داری کے خواہاں ہیں۔‘ اسی روز واشنگٹن اور بیجنگ کے درمیان تجارتی جنگ میں ٹیرف روکنے پر اتفاق بھی کیا گیا۔

ادھر چین، برازیل، کینیڈا، یورپی کونسل اور آسیان ممالک کے رہنما اقتصادی شراکت داری کو مستحکم کرنے اور نئے تجارتی معاہدوں کو حتمی شکل دینے کے لیے سرگرم ہیں۔ چینی حکام تجارت میں کثیرالجہتی نظام کے فروغ پر زور دے رہے ہیں جبکہ دیگر رہنما امریکا کی عدم موجودگی میں علاقائی تعلقات کو مضبوط بنانے کی کوشش کر رہے ہیں۔

اسی دوران چین کے حمایت یافتہ ریجنل کمپری ہینسو اکنامک پارٹنرشپ (آر سی ای پی) کے اجلاس کا بھی امکان ہے، جو دنیا کے سب سے بڑے تجارتی بلاک کے طور پر عالمی جی ڈی پی کا تقریباً 30 فیصد احاطہ کرتا ہے اور ماہرین کے مطابق امریکی ٹیرف کے خلاف ایک توازن پیدا کر سکتا ہے۔

یورپی کونسل کے صدر انتونیو کوسٹا نے چینی وزیرِاعظم لی چیانگ سے ملاقات میں خام مال پر چین کی برآمدی پابندیوں پر تشویش ظاہر کی اور روس-یوکرین جنگ کے خاتمے میں بیجنگ کے کردار پر زور دیا۔

برازیلی صدر لولا دا سلوا نے کہا کہ ٹرمپ کے ساتھ ملاقات سے دونوں ممالک کے درمیان زیادہ سازگار تجارتی معاہدے کی راہ ہموار ہو گئی ہے۔