بنیادی تشویش بیرونی کھاتے کی کمزوری ہے۔ درآمدات میں تیزی سے اضافہ ہوا ہے، جو ستمبر میں 5.9 ارب ڈالر تک پہنچ گئی ہیں، جو اگست 2022 کے بعد سب سے زیادہ سطح ہے، جیسا کہ پاکستان بیورو آف اسٹیٹکس (پی بی ایس) کے اعداد و شمار ظاہر کرتے ہیں۔ گزشتہ 12 ماہ کے دوران درآمدات 63 ارب ڈالر تک پہنچ چکی ہیں اور بڑھ رہی ہیں، جبکہ برآمدات تقریباً جمود کا شکار ہیں اور ترسیلات زر کی نمو بھی کمزور پڑ گئی ہے۔ یہ صورتِ حال زرمبادلہ کے ذخائر بڑھانے کی کوششوں کو خطرے میں ڈال رہی ہے، جو اب بھی تین ماہ کی درآمدی ضرورت سے کم ہیں۔

اس چیلنج کو مزید سنگین بنانے والی بات یہ ہے کہ درآمدات اس وقت بھی بڑھ رہی ہیں جب معاشی نمو سست اور تیل کی قیمتیں نسبتاً کم ہیں۔ خطرہ یہ ہے کہ اگر طلب یا تیل کی قیمتوں میں اضافہ ہوا تو افراطِ زر ایک بار پھر بڑھ سکتا ہے، اور اسٹیٹ بینک کے درمیانی مدت کے 5 سے 7 فیصد ہدف سے تجاوز کر سکتا ہے۔ افراطِ زر کے توقعات کو مستحکم رکھنے کے لیے اسٹیٹ بینک کے پاس دو راستے ہیں: یا تو روپے کی قدر میں کمی کی اجازت دے ، جس سے برآمدات میں بہتری آئے گی مگر درآمدات مہنگی ہو جائیں گی — یا پھر حقیقی شرحِ سود کو مثبت اور بلند سطح پر برقرار رکھے۔ اسٹیٹ بینک نے دوسرا راستہ اختیار کیا ہے، تاکہ کرنسی کی قدر کو مستحکم رکھا جا سکے اور بیرونی کھاتے میں توازن برقرار رہے۔

تاہم اعلیٰ شرحِ سود سرمایہ کاری میں کمی کی واحد وجہ نہیں ہے۔ بھاری ٹیکسوں اور توانائی کے بلند اخراجات جیسے عوامل بھی صنعتی توسیع میں بڑی رکاوٹ ہیں۔ لہٰذا، شرحِ سود میں کمی بھی فوری طور پر مینوفیکچرنگ سیکٹر میں سرمایہ کاری بحال نہیں کرے گی۔

دوسری طرف، شرحِ سود میں کمی سے روپے میں بچت کی حوصلہ شکنی ہو سکتی ہے، کرنسی کی قدر میں عدم استحکام اور تنزلی کی توقعات بڑھ سکتی ہیں، اور ڈالرائزیشن کا رجحان پیدا ہو سکتا ہے، جو افراطِ زر کا ایک نیا ذریعہ بن سکتا ہے۔ اس کے علاوہ، مارکیٹ میں سرمایہ اشیائے صرف (کموڈیٹیز) میں منتقل ہونے کا خطرہ بھی ہے، جو مہنگائی کو مزید ہوا دے سکتا ہے۔

افراطِ زر پہلے ہی اپریل میں 0.3 فیصد کی کم ترین سطح سے بڑھ کر ستمبر میں 5.6 فیصد پر پہنچ چکا ہے، جبکہ گزشتہ تین ماہ میں سے دو میں مہنگائی ماہانہ بنیاد پر 2 فیصد سے زیادہ رہی۔ یہ رجحان بنیادی طور پر خوراک کی مہنگائی سے منسلک ہے، جسے جزوی طور پر سیلاب اور گندم کی کمزور امدادی قیمتوں کی پالیسی نے بڑھایا ہے۔ مصنوعی طور پر کم گندم کی قیمتیں، جو درآمدات اور سرکاری ذخائر کے اجرا سے برقرار رکھی گئیں، نے دیہی معیشت کو نقصان پہنچایا ہے اور اب اچانک قیمتوں میں تیز اضافہ دیکھنے میں آ رہا ہے۔ سیلاب نے سبزیوں اور دیگر اشیائے خوردنی کی قیمتوں میں بھی اضافہ کر دیا ہے۔

اس کے برعکس، کور انفلیشن نسبتاً مستحکم ہے، جو 7 سے 7.5 فیصد کے درمیان ہے ، جو گزشتہ سال کے 10 سے 10.5 فیصد کے مقابلے میں واضح کمی ہے، اور یہ کرنسی استحکام کا ثبوت ہے۔ سستا تیل اور اجناس کی کم قیمتوں نے افراطِ زر کو قابو میں رکھنے اور کرنٹ اکاؤنٹ خسارے کو محدود رکھنے میں مدد دی ہے۔ کم تیل کی قیمتوں نے حکومت کو یہ موقع دیا کہ وہ پٹرولیم مصنوعات پر لیوی بڑھا سکے بغیر قیمتوں میں اضافہ کیے، جس سے پرائمری فِسکل سرپلس کے ہدف کو سہارا ملا، حالانکہ ایف بی آر کے ٹیکس ریونیو مایوس کن ہیں۔

پاکستان کو اپنے مالی اور زری نظم و ضبط کو برقرار رکھنا ہوگا تاکہ زرمبادلہ کے ذخائر مضبوط کیے جا سکیں؛ کسی بھی نرمی سے کرنسی کے استحکام کو خطرہ لاحق ہو سکتا ہے۔ مالی سال 26 کی پہلی سہ ماہی میں کرنٹ اکاؤنٹ خسارے میں بدل گیا ہے، اور تجارتی اعداد و شمار میں بڑھتا ہوا فرق مزید بگاڑ کی نشاندہی کرتا ہے۔ برآمد کنندگان نے اپنے ڈالرز فارورڈ بیچ رکھے ہیں، اور جیسے ہی دباؤ بڑھے گا، انفلووز کم ہو سکتے ہیں۔ انٹر بینک اور گرے مارکیٹ کے درمیان بڑھتا ہوا فرق بینکوں کو ترسیلات پر زیادہ پریمیم دینے پر مجبور کر رہا ہے ، جو مستقبل میں روپے کی قدر میں کمی کے امکان کو ظاہر کرتا ہے۔

اگر روپیہ گرتا ہے، تو افراطِ زر تیزی سے بڑھے گا، جس سے اسٹیٹ بینک کو دوبارہ شرحِ سود بڑھانے پر مجبور ہونا پڑ سکتا ہے۔ مختصر یہ کہ جب تک زرمبادلہ کے ذخائر 3.5 سے 4 ماہ کی درآمدات کے لیے کافی نہ ہو جائیں، حقیقی شرحِ سود کو بلند رکھنا ناگزیر ہے۔ یہ بہتر ہے کہ احتیاط سے کام لیا جائے، کیونکہ اس مرحلے پر انتظار اور دیکھو کی پالیسی “کرو یا مرو “ سے بہتر ہے۔

کاپی رائٹ بزنس ریکارڈر، 2025