کمیٹی نے فرنٹیئر ورکس آرگنائزیشن (ایف ڈبلیو او) کے لیے 45 ملین اماراتی درہم کے مساوی تکنیکی ضمنی گرانٹ (ٹی ایس جی ) کی بھی منظوری دی، جو روپے کی مد میں دستیاب ہوگی، تاکہ ایف ڈبلیو او کی متحدہ عرب امارات میں جاری تعمیراتی سرگرمیوں کے لیے استعمال ہونے والی اوور ڈرافٹ سہولت کو کلیئر کیا جا سکے۔ یہ دونوں تجاویز وزارتِ دفاع کی جانب سے پیش کی گئیں۔

اسی دوران ای سی سی اجلاس میں الیکشن کمیشن آف پاکستان (ای سی پی) نے مالی سال 2025-26 کے دوران بلدیاتی انتخابات کے اخراجات پورے کرنے کے لیے 455.984 ملین روپے کی تکنیکی ضمنی گرانٹ کی درخواست کی، جسے کمیٹی نے منظور کر لیا۔

اسی طرح وزارتِ خزانہ کی جانب سے پاکستان منٹ رہائشی کالونی میں علیحدہ بجلی کے میٹرز کی تنصیب کے لیے 112.118 ملین روپے کی ضمنی گرانٹ کی منظوری بھی دے دی گئی۔

ای سی سی نے وزارتِ داخلہ و انسدادِ منشیات کنٹرول کی جانب سے پیش کردہ ایک سمری پر بھی غور کیا اور منظوری دی، جس کے تحت ہیڈکوارٹر پاکستان رینجرز (پنجاب) کے لیے ہیلی کاپٹرز کی مرمت کے پرزہ جات کی خریداری کے مقصد سے مالی سال جاریہ کے دوران 21.500 ملین روپے کی تکنیکی ضمنی گرانٹ مختص کی گئی۔

وزیرِ خزانہ محمد اورنگزیب کی زیرِ صدارت اقتصادی رابطہ کمیٹی (ای سی سی) کے اجلاس میں قیمتوں کے استحکام کے لیے مربوط اقدامات کی ضرورت پر زور دیا گیا۔ وزیرِ خزانہ نے کہا کہ عوام کی خریداری کی طاقت کے تحفظ اور مجموعی قیمتوں کے استحکام کو یقینی بنانے کے لیے مسلسل نگرانی، متعلقہ اداروں کے درمیان بہتر رابطہ کاری، اور بروقت اقدامات ناگزیر ہیں۔

اجلاس کے دوران وزارتِ منصوبہ بندی، ترقی و خصوصی اقدامات کے چیف اکانومسٹ ڈاکٹر امتیاز احمد نے ملک میں مہنگائی کے رجحانات اور قیمتوں میں اتار چڑھاؤ پر تفصیلی بریفنگ دی، جس میں نیشنل پرائس مانیٹرنگ کمیٹی (این پی ایم سی ) کی سفارشات اور مشاہدات بھی شامل تھے۔

ڈاکٹر امتیاز نے کمیٹی کو بتایا کہ حالیہ سیلاب سے قبل مہنگائی کی شرح نسبتاً معتدل تھی، تاہم ستمبر 2025 میں یہ 5.6 فیصد تک بڑھ گئی کیونکہ سیلاب سے زرعی زمینوں اور مویشیوں کو نقصان پہنچا، جس سے سپلائی چین متاثر ہوئی اور خوراک کی مہنگائی میں اضافہ ہوا۔

انہوں نے مزید بتایا کہ سینسیٹیو پرائس انڈیکس (ایس پی آئی ) میں بھی اکتوبر کے دوران اضافہ ریکارڈ کیا گیا۔

پاکستان بیورو آف اسٹیسٹکس (پی بی ایس) کے اعداد و شمار کا حوالہ دیتے ہوئے ڈاکٹر امتیاز احمد نے بتایا کہ اگرچہ چند بنیادی اشیاء جیسے مرغی، چاول اور ایل پی جی کی قیمتوں میں کمی دیکھی گئی، تاہم چینی، گائے کا گوشت، خوردنی تیل اور گھی جیسی اہم اجناس کی قیمتوں میں اضافہ ریکارڈ کیا گیا۔

انہوں نے کمیٹی کو بتایا کہ نیشنل پرائس مانیٹرنگ کمیٹی (این پی ایم سی ) نے مہنگائی پر قابو پانے کے لیے مختلف پالیسی اقدامات پر غور کیا، جن میں عالمی قیمتوں کے اثرات کا تجزیہ (سینسیٹیوٹی اینالیسس)، وفاقی و صوبائی اداروں کے درمیان رابطہ بہتر بنانے، اور سیلاب سے متاثرہ اضلاع کے کسانوں کے لیے ہدفی زرعی قرضے شامل ہیں۔

مزید برآں کمپٹیشن کمیشن آف پاکستان (سی سی پی ) کو خوردنی تیل اور گھی کے شعبے میں ممکنہ گٹھ جوڑ کی تحقیقات کا ٹاسک دیا گیا ہے۔

ڈاکٹر امتیاز نے مزید بتایا کہ رمضان کے دوران قیمتوں کے استحکام کے لیے جامع منصوبہ بندی جاری ہے اور صوبوں کو ہدایت کی گئی ہے کہ وہ پی بی ایس کے ڈیسیژن سپورٹ سسٹم کو بہتر مارکیٹ مانیٹرنگ اور قیمتوں کی نگرانی کے لیے استعمال کریں۔

وزیرِ خزانہ محمد اورنگزیب نے تفصیلی تجزیے کو سراہتے ہوئے متعلقہ وزارتوں اور صوبائی حکام کو ہدایت کی کہ مہنگائی پر قابو پانے اور قیمتوں کے استحکام کے لیے تجویز کردہ اقدامات پر موثر عملدرآمد یقینی بنایا جائے۔

انہوں نے اس بات پر زور دیا کہ عوام کی خریداری کی صلاحیت کے تحفظ اور مارکیٹ کے استحکام کے لیے مسلسل نگرانی، ادارہ جاتی ہم آہنگی، اور بروقت اقدامات ضروری ہیں۔

بعدازاں ای سی سی نے اجلاس کے باقاعدہ ایجنڈے پر غور کیا اور وزارتِ تجارت کی جانب سے پیش کردہ درآمدی پالیسی آرڈر 2022 کے تحت پری شپمنٹ انسپکشن (پی ایس آئی ) کے فریم ورک میں بہتری سے متعلق تجاویز کا جائزہ لیا۔ کمیٹی نے مجاز اور رجسٹرڈ پی ایس آئی ایجنسیوں کو پالیسی کے مطابق معائنہ کرنے کی اجازت دینے کی منظوری دی۔

ای سی سی نے وزارتِ تجارت کی جانب سے درآمدی پالیسی آرڈر 2022 کے اپینڈکس ای کے تحت ذاتی سامان، رہائش کی منتقلی، اور تحفہ اسکیموں کے ذریعے گاڑیوں کی درآمد کے طریقہ کار میں مجوزہ ترامیم پر بھی غور کیا۔ تفصیلی مشاورت کے بعد کمیٹی نے ہدایت دی کہ وزارت تجارت متعلقہ اسٹیک ہولڈرز سے مزید مشاورت کے بعد تجویز دوبارہ پیش کرے۔

اجلاس میں قیمتی دھاتوں اور زیورات کی درآمد و برآمد سے متعلق پالیسی پر بھی غور کیا گیا، جس میں کمیٹی نے موجودہ فریم ورک کے تسلسل کے ساتھ شفافیت اور خودکار نظام کے فروغ کے اقدامات کی منظوری دی تاکہ افادیت اور نگرانی میں بہتری لائی جا سکے۔