ترجمان دفترِ خارجہ طاہر اندرابی نے ہفتہ وار میڈیا بریفنگ کے دوران صحافیوں کو بتایا کہ افغان ٹرانزٹ ٹریڈ (اے ٹی ٹی) معاہدے کے تحت اشیاء کی نقل و حرکت فی الحال بند ہے اور سیکیورٹی صورتِ حال کے جائزے تک معطل رہے گی۔

انہوں نے کہا کہ افغان جانب سے ان تجارتی راستوں پر مسلسل حملے کیے جا رہے ہیں جن میں معصوم پاکستانی شہری جاں بحق ہو رہے ہیں۔ ہمارے لیے پاکستانیوں کی جان کسی بھی تجارتی سامان سے زیادہ قیمتی ہے۔

اندرابی نے کہا کہ پاکستان ٹرانزٹ ٹریڈ کی معطلی کے باعث تاجروں اور عام شہریوں کو درپیش مشکلات پر گہرا افسوس ظاہر کرتا ہے، تاہم انہوں نے زور دیا کہ سیکیورٹی اور شہریوں کی حفاظت کو ہر صورت فوقیت حاصل ہے۔ انہوں نے کہا کہ پاکستان کی سلامتی اور اس کے عوام کی زندگیاں سب سے زیادہ اہمیت رکھتی ہیں۔

ترجمان نے افغان عبوری حکام پر زور دیا کہ وہ اس امر کو یقینی بنائیں کہ افغان سرزمین پاکستان میں دہشتگردی کے فروغ یا سرپرستی کے لیے استعمال نہ ہو۔

ان کا کہنا تھا کہ ہمارا پیغام بالکل واضح ہے: ان حملوں کو روکا جائے، کالعدم ٹی ٹی پی اور دیگر مسلح گروہوں کے مجرموں اور دہشتگردوں کو قابو میں لایا جائے۔ یہ کوئی غیر منطقی مطالبہ نہیں بلکہ دوحہ معاہدے کے تحت اپنے ہی وعدوں کی پاسداری کا معاملہ ہے۔

اندرابی نے کہا کہ اگرچہ طالبان کے افغانستان میں اقتدار سنبھالنے کے بعد پاکستان نے ابتدا میں امید ظاہر کی تھی، تاہم تحریکِ طالبان پاکستان (ٹی ٹی پی) اور اس کے اتحادی گروہوں کی جانب سے بارہا سرحد پار حملوں نے صورتحال کو یکسر بدل دیا ہے۔

چمن اور انگور اڈہ سمیت تجارتی راستوں کی بندش سے سرحد پار تجارت اور قریبی علاقوں میں اشیاء کی دستیابی متاثر ہوئی ہے، تاہم حکام کا کہنا ہے کہ افغان جانب سے سیکورٹی کی واضح ضمانتیں ملنے تک یہ فیصلہ برقرار رہے گا۔