اقوامِ متحدہ میں پاکستان کے قائم مقام مستقل نمائندے سفیر عثمان جدون نے اپنے بیان میں کہا کہ یہ اقدامات مصر کے شہر شرم الشیخ میں طے پانے والے معاہدے کی روح اور متن دونوں کے منافی ہیں۔

انہوں نے کہا کہ امن کی کوششوں کو ناکام نہیں ہونے دینا چاہیے۔ ان کے مطابق، پائیدار استحکام مسلسل قبضے اور جبر سے حاصل نہیں کیا جا سکتا۔

سفیر عثمان جدون نے اسرائیلی کنیسٹ کی جانب سے دو مسودہ قوانین کی ابتدائی منظوری کی بھی مذمت کی، جن کا مقصد مغربی کنارے اور ایک غیر قانونی بستی پر اسرائیلی خودمختاری مسلط کرنا ہے، جو فلسطینی عوام کے تاریخی حقوق، بین الاقوامی قانون اور متعلقہ اقوامِ متحدہ کی قراردادوں کی کھلی خلاف ورزی ہے۔

پاکستانی نمائندے نے جنگ بندی کے مکمل نفاذ، مستقل طور پر لڑائی کے خاتمے، غزہ سے اسرائیلی انخلا، انسانی امداد تک غیر مشروط رسائی، اور جامع تعمیرِ نو منصوبے پر زور دیا۔

انہوں نے کہا کہ غزہ میں کیے گئے سنگین جرائم کے مرتکب افراد کو انصاف کے کٹہرے میں لانا ناگزیر ہے۔

انہوں نے مزید کہا کہ مغربی کنارے میں اسرائیل کی غیر قانونی سرگرمیوں، جن میں جبری بے دخلیاں، غیر قانونی بستیاں اور انضمام شامل ہیں، کا خاتمہ یقینی بنایا جائے۔ ان کے مطابق، حرم الشریف اور مسجد اقصیٰ کی قانونی اور تاریخی حیثیت کا احترام لازمی ہے۔

انہوں نے کہا کہ اقوامِ متحدہ کی ایجنسی یو این آر ڈبلیو اے کے بلا رکاوٹ کام کو یقینی بنایا جائے، کیونکہ اس کا کردار غزہ میں زندگی بچانے والی امداد کی فراہمی میں نہایت اہم ہے۔ ان کے بقول، عالمی عدالتِ انصاف نے اپنے تازہ فیصلے میں واضح کیا ہے کہ اسرائیل پر لازم ہے کہ وہ اقوامِ متحدہ اور اس کے اداروں، بالخصوص یو این آر ڈبلیو اے، کی امدادی سرگرمیوں میں سہولت فراہم کرے۔

سفیر عثمان جدون نے زور دیا کہ ایک ایسا سیاسی عمل فوری طور پر شروع کیا جائے جو اقوامِ متحدہ کی قراردادوں اور بین الاقوامی اصولوں کے مطابق ہو، تاکہ 1967 سے پہلے کی سرحدوں پر مبنی ایک آزاد، خودمختار اور متصل ریاستِ فلسطین قائم کی جا سکے، جس کا دارالحکومت القدس الشریف ہو۔