وزیر دفاع خواجہ آصف نے اتوار کو کہا کہ یہ بیان اس وقت سامنے آیا ہے جب اسلام آباد اور کابل نے دوحہ میں طویل مذاکرات کے بعد فوری جنگ بندی پر اتفاق کیا، جس میں دونوں فریقوں نے ایک دوسرے کی خودمختاری کا احترام کرنے اور اس ماہ کے آخر میں بات چیت جاری رکھنے کا وعدہ کیا۔

یہ 13 گھنٹے کے مذاکرات قطر میں ہوئے جس میں ترکیہ ثالث کے طور پر کردار ادا کر رہا تھا اور ان کا مقصد پاک-افغان سرحد پر بڑھتی ہوئی کشیدگی کو کم کرنا تھا۔

خواجہ آصف کی قیادت میں ایک اعلیٰ سطح پاکستانی وفد ہفتے کے روز دوحہ پہنچا تاکہ افغان طالبان کے حکام سے بات چیت کرے، جبکہ چند روز تک سرحدی جھڑپیں اور پاکستان کی جانب سے افغانستان میں گل بہادر گروپ کے کیمپوں پر حملے جاری تھے۔

وزیر دفاع نے ایکس پر اپنے پیغام میں اعلان کیا کہ جنگ بندی کے معاہدے کو حتمی شکل دے دی گئی ہے، افغانستان سے پاکستان پر ہونے والے دہشتگردانہ حملے فوری طور پر بند ہو جائیں گے۔

الجزیرہ عربی کے ساتھ انٹرویو میں وفاقی وزیر نے وضاحت کی کہ دونوں ہمسایہ ممالک کے درمیان اس معاہدے کا بنیادی مقصد دہشتگردی کے خطرے کو ختم کرنا ہے۔

انہوں نے کہا کہ دہشتگردی برسوں سے پاکستان اور افغانستان کی سرحدی علاقوں کو متاثر کر رہی ہے۔

خواجہ آصف نے کہا کہ دونوں ممالک نے یہ نتیجہ اخذ کیا ہے کہ دہشتگردی کا فوری خاتمہ ضروری ہے۔ دونوں ممالک دہشتگردی کو روکنے کیلئے سنجیدہ اقدامات کریں گے، بصورتِ دیگر، علاقائی امن کو سنگین خطرات لاحق ہوسکتے ہیں۔

انہوں نے کہا کہ افغان وزیر دفاع ملا یعقوب نے تسلیم کیا کہ دہشتگردی ہی ان کے تعلقات میں کشیدگی کی بنیادی وجہ تھی جسے اب حل کیا جائے گا۔

انہوں نے امید ظاہر کی کہ اب امن قائم ہوگا اور پاکستان اور افغانستان کے تعلقات معمول پر آئیں گے۔

انہوں نے کہا کہ اس کے نتیجے میں پاکستان-افغانستان تجارتی اور ٹرانزٹ سرگرمیاں بھی بحال ہوں گی اور افغانستان پاکستانی بندرگاہوں کا استعمال کر سکے گا۔