پولیس افسر سونی اومباجینو نے اے ایف پی کو بتایا کہ یہ افسوسناک واقعہ اُس وقت پیش آیا جب ایک درخت ان کے گھر پر گر گیا۔ ہلاک ہونے والوں میں دو بچے بھی شامل تھے جن کی عمریں دو اور گیارہ سال تھیں۔ یہ حادثہ منیلا سے تقریباً 153 کلومیٹر جنوب مشرق میں واقع قصبے پیتوگو کے قریب ایک گاؤں میں صبح سویرے پیش آیا، جب طوفان نے لوزون کے جنوب مشرقی حصے کو اپنی لپیٹ میں لے رکھا تھا۔

محکمہ موسمیات کے مطابق فینگ شین اتوار کی صبح منیلا بے کے اوپر منڈلا رہا تھا اور 90 کلومیٹر فی گھنٹہ کی رفتار سے جھکڑ چل رہے تھے۔ طوفان کے شمالی صوبوں کی جانب بڑھنے کی پیش گوئی کی گئی ہے۔

مقامی ڈیزاسٹر مینجمنٹ حکام کے مطابق ہفتے سے اب تک تقریباً 47 ہزار افراد اپنے گھروں سے نکل کر سرکاری عارضی پناہ گاہوں میں منتقل ہو چکے ہیں۔ محکمہ موسمیات نے ساحلی علاقوں میں ممکنہ سیلاب اور لینڈ سلائیڈنگ کے خطرے سے بھی خبردار کیا ہے۔

فلپائن ہر سال تقریباً 20 طوفانوں اور سمندری جھکڑوں کی زد میں آتا ہے، جو اکثر غریب آبادی والے علاقوں کو متاثر کرتے ہیں۔ ماہرینِ موسمیات کا کہنا ہے کہ انسانی سرگرمیوں سے ہونے والی ماحولیاتی تبدیلی کے باعث یہ طوفان مزید شدید ہو رہے ہیں۔

فینگ شین ایسے وقت میں آیا ہے جب ملک گزشتہ تین ہفتوں کے دوران آنے والے شدید زلزلوں سے ابھی سنبھل نہیں پایا، جن میں کم از کم 87 افراد ہلاک ہو چکے ہیں۔