ماہانہ بنیادوں پر بھی موبائل فونز کی درآمدات میں اضافہ ہوا ہے۔ ستمبر 2025 میں یہ درآمدات 56.35 ارب روپے تک پہنچ گئیں، جو اگست 2025 میں 43.91 ارب روپے تھیں۔

اس طرح 28.45 فیصد اضافہ ہوا۔ سالانہ بنیادوں پر موازنہ کیا جائے تو ستمبر 2025 کی درآمدات 56.35 ارب روپے رہیں جو ستمبر 2024 کی 29.01 ارب روپے کی درآمدات کے مقابلے میں 94.44 فیصد زیادہ ہیں۔

تاہم مکمل مالی سال 2024-25 کے دوران موبائل فونز کی مجموعی درآمدات 417.35 ارب روپے رہیں، جو مالی سال 2023-24 کی 535.69 ارب روپے کی درآمدات کے مقابلے میں 22.09 فیصد کمی ظاہر کرتی ہیں۔

ٹیلیکام سیکٹر کی مجموعی درآمدات بھی مالی سال 2024-25 میں کم ہو کر تقریباً 594 ارب روپے رہ گئیں، جبکہ گزشتہ مالی سال میں یہ 669.58 ارب روپے تھیں، اس طرح 11.30 فیصد کمی ریکارڈ کی گئی۔

دوسری طرف مقامی سطح پر موبائل فونز کی پیداوار میں زبردست اضافہ ہوا ہے۔ سال 2025 کے پہلے سات ماہ کے دوران مقامی مینوفیکچرنگ اور اسمبلنگ پلانٹس نے 17.83 ملین موبائل فونز تیار یا اسمبل کیے جبکہ اسی عرصے میں صرف 1.03 ملین فونز کمرشل بنیاد پر درآمد کیے گئے۔

صرف جولائی 2025 میں 3.59 ملین موبائل فونز مقامی طور پر تیار یا اسمبل کیے گئے جبکہ کمرشل طور پر صرف 0.17 ملین فونز درآمد ہوئے۔ ان 17.83 ملین میں 9.36 ملین 2G فونز اور 8 ملین اسمارٹ فونز شامل ہیں۔

پاکستان ٹیلی کمیونیکیشن اتھارٹی کے مطابق پاکستان میں استعمال ہونے والے موبائل فونز میں 68 فیصد اسمارٹ فونز اور 32 فیصد 2G فونز ہیں۔

یہ اعداد و شمار اس بات کی عکاسی کرتے ہیں کہ درآمدات میں اضافے کے ساتھ ساتھ مقامی صنعت نے بھی مارکیٹ میں اپنی جگہ مضبوط کی ہے، جو ملکی معیشت اور ٹیکنالوجی کے لیے مثبت پیش رفت ہے۔