وزارتِ خزانہ کی جانب سے جاری بیان کے مطابق، محمد اورنگزیب نے واشنگٹن ڈی سی میں آئی ایم ایف–ورلڈ بینک کے سالانہ اجلاسوں کے موقع پر اعلیٰ سطح کی متعدد ملاقاتیں کیں جن کا مقصد سرمایہ کاری شراکت داریوں کو فروغ دینا، دوطرفہ اور کثیرالجہتی تعاون کو مضبوط بنانا ہے۔

بینجمن بلیک سے ملاقات کے دوران محمد اورنگزیب نے قیادت کی سطح پر تجارت اور سرمایہ کاری کے تعلقات کو فروغ دینے کے عزم پر زور دیا اور پاکستان میں منصوبوں کے لیے نجی شعبے کی قیادت میں فنڈنگ میں دلچسپی لینے پر ڈی ایف سی کے کردار کا خیرمقدم کیا۔

ایک علیحدہ ملاقات میں، محمد اورنگزیب نے آذربائیجان کے فرسٹ نائب وزیر خزانہ انار کریموف سے ملاقات کی، جس میں دونوں ممالک کے درمیان مضبوط اقتصادی اور اسٹریٹجک تعلقات کی توثیق کی گئی۔

انہوں نے آذربائیجان کو سی او پی 29 کی کامیاب میزبانی پر مبارکباد دی اور پاکستان-آذربائیجان ترجیحی تجارتی معاہدے (جنوری 2025) اور ٹرانزٹ ٹریڈ ایگریمنٹ (دسمبر 2024) کو تیل اور چاول سے آگے بڑھا کر ٹیکسٹائل، دواسازی، کیمیکلز، مشینری اور زرعی مصنوعات تک وسعت دینے کے لیے کلیدی پلیٹ فارمز قرار دیا۔

محمد اورنگزیب نے ایم آئی جی اے کے ایگزیکٹو نائب صدر ہیروشی ماتانو سے بھی ملاقات کی، جس میں انہوں نے جاری ثالثی معاملات میں ایم آئی جی اے کی معاونت پر اظہارِ تشکر کیا اور سرمایہ کاروں کے اعتماد کے ساتھ ساتھ قومی مفادات کے تحفظ کے عزم کا اعادہ کیا۔

انہوں نے خوراک، کھاد، توانائی اور ضروری مشینری جیسی اہم درآمدات تک رسائی کو یقینی بنانے کے لیے قلیل مدتی ٹریڈ فنانس سہولت کی ایم آئی جی اے کی تجویز کا خیرمقدم کیا اور اس کے بروقت نفاذ کی اہمیت پر زور دیا۔

انہوں نے پاکستان کے بجلی کے ترسیلی اور تقسیماتی شعبوں میں ایم آئی جی اے کی مسلسل معاونت کا بھی اعتراف کیا۔

قرض دہندگان کے فورم کے گول میز اجلاس میں وزیر خزانہ نے بھاری قرض ادائیگی اور سماجی شعبے میں ضروری سرمایہ کاری کے درمیان توازن کی اہمیت پر گفتگو کی۔

انہوں نے فورم کے قیام کو رکن ممالک کے درمیان مشترکہ اقدامات، علم کے تبادلے اور پالیسی ہم آہنگی کے لیے ایک قیمتی پلیٹ فارم قرار دیا۔

انہوں نے مؤثر قرضہ جات کے انتظام، تکنیکی صلاحیتوں میں بہتری اور ماحولیاتی لچک اور بنیادی ڈھانچے کی ترقی کے لیے پائیدار مالی وسائل تک بہتر رسائی کی ضرورت پر زور دیا۔

محمد اورنگزیب نے پاکستان بینک فنڈ اسٹاف ایسوسی ایشن کے اراکین سے ملاقات کی، جس میں انہوں نے حالیہ مالیاتی، مانیٹری اور بیرونی شعبے میں پیش رفت کے بارے میں آگاہ کیا اور ملک کی خودمختار کریڈٹ ریٹنگ میں بہتری کا حوالہ دیا۔

انہوں نے شرکاء کے سوالات کے جوابات دیتے ہوئے پاکستان کے مالیاتی نظم و ضبط، توانائی اصلاحات، نجکاری، سماجی تحفظ اور جامع و سبز ترقی کے عزم کا اعادہ کیا۔

بعد ازاں محمد اورنگزیب نے اسٹینڈرڈ چارٹرڈ بینک کے سینئر انتظامی حکام سے ایک نتیجہ خیز ملاقات کی، جس میں انہوں نے بینک اور پاکستان کے درمیان طویل شراکت داری کو سراہا۔ گفت و شنید کے دوران، وزیر خزانہ نے بین الاقوامی ریٹنگ ایجنسیوں کی جانب سے پاکستان کی جاری اقتصادی اصلاحات کی بیرونی توثیق کو نمایاں کیا۔

انہوں نے ٹیم کو پاکستان کے حالیہ پانڈا بانڈ کے اجرا اور یوروبانڈز و بین الاقوامی سکوک کے ذریعے عالمی سرمایہ جاتی منڈیوں سے فنڈز حاصل کرنے کے منصوبوں کے بارے میں آگاہ کیا۔

ملاقات میں تجارتی فنانسنگ سہولتوں پر بھی تبادلہ خیال ہوا، جس میں وزیر خزانہ نے بینک سے کہا کہ وہ تعاون کو مزید مضبوط بنانے کے لیے اضافی تجاویز پیش کرے۔

اس سے قبل دن کے آغاز میں محمد اورنگزیب نے عالمی سرمایہ کاروں سے سٹی میکرو فورم میں خطاب کیا جہاں انہوں نے سیکریٹری خزانہ اور گورنر اسٹیٹ بینک آف پاکستان کے ہمراہ پاکستان کی مالیاتی، مانیٹری اور بیرونی شعبوں میں مثبت پیش رفت کا جامع جائزہ پیش کیا۔

انہوں نے موجودہ معاشی رفتار کو مؤثر استحکامی اقدامات، ساختی اصلاحات اور محتاط مالیاتی نظم و نسق کا نتیجہ قرار دیا اور آئی ایم ایف کے ساتھ اسٹاف لیول معاہدے کی کامیاب تکمیل کو نمایاں کامیابی قرار دیا۔

بعدازاں سینیٹر اورنگزیب نے ایم ای این اے پی خطے کے وزرائے خزانہ اور مرکزی بینک گورنرز کے ہمراہ آئی ایم ایف کی منیجنگ ڈائریکٹر کرسٹالینا جورجیوا سے ملاقات میں شرکت کی۔

بطور مرکزی مقرر انہوں نے پاکستان کی میکرو اکنامک استحکام کے حصول میں کامیابی کو اجاگر کیا اور آئی ایم ایف کے ساتھ اسٹاف لیول معاہدے کا خیرمقدم کیا۔

انہوں نے حکومت کے ٹیکس نظام، توانائی، سرکاری اداروں اور نجکاری کے شعبوں میں اصلاحات کو آگے بڑھانے کے عزم کا اعادہ کیا۔ انہوں نے پاکستان کی ڈیجیٹل تبدیلی اور مسابقت اور برآمدات میں اضافے کے لیے بنائی گئی ٹیرف پالیسی کو اجاگر کیا، ساتھ ہی کان کنی، ڈیجیٹل انفرااسٹرکچر، زراعت اور دواسازی سمیت اہم شعبوں میں بین الاقوامی سرمایہ کاری کی دعوت دی۔

دن کے اختتام پر وزیر خزانہ نے پاکستان ہاؤس میں پاکستانی سفیر رضوان سعید شیخ کی میزبانی میں ایک ورکنگ ڈنر کے دوران ممتاز پاکستانی صنعت کاروں سے ملاقات کی۔

وزیر خزانہ نے شرکاء کو ملک کی معاشی صورتحال، بشمول میکرو اکنامک استحکام اور ساختی اصلاحات سے آگاہ کیا۔ انہوں نے ریگولیٹری عمل کو آسان بنانے، ٹیکس نظام کو بہتر کرنے اور توانائی، سرکاری اداروں (ایس او ایز) اور نجکاری سے متعلق مسائل کے حل پر زور دیا۔