پاکستان ٹیکس ایڈوائزرز ایسوسی ایشن کے چیئرمین اور سپریم کورٹ کے وکیل جاوید اقبال قاضی کی جانب سے لکھے گئے ایک خط میں کہا گیا ہے کہ فیڈرل بورڈ آف ریونیو (ایف بی آر) نے ٹیکس ایئر 2025 کے لیے انکم ٹیکس گوشوارے جمع کرانے کی تاریخ 30 ستمبر کی نصف شب کو بڑھا کر 15 اکتوبر 2025 کر دی تھی۔ یہ فیصلہ اس وقت کیا گیا جب ایف بی آر/پی آر اے ایل کا آن لائن نظام آئرس مکمل طور پر بند ہو گیا تھا اور ٹیکس دہندگان کو سسٹم تک رسائی حاصل نہیں ہو رہی تھی۔

جاوید قاضی کے مطابق گزشتہ چار روز سے ملک کے مختلف حصوں، خصوصاً پنجاب اور اسلام آباد میں، انٹرنیٹ سروس یا تو مکمل طور پر بند رہی یا انتہائی ناقص رہی، جس کے باعث بیشتر ٹیکس دہندگان اور ٹیکس مشیر اپنے گوشوارے آن لائن جمع نہیں کرا سکے۔

انہوں نے کہا کہ موجودہ صورتحال کے پیش نظر ایف بی آر کو چاہیے کہ وہ دانشمندی کا مظاہرہ کرتے ہوئے بروقت تاریخ میں توسیع کا اعلان کرے تاکہ آخری لمحات میں افراتفری اور آئرس سسٹم کے دوبارہ بیٹھ جانے کی صورتحال سے بچا جا سکے۔

جاوید قاضی نے وضاحت کی کہ اس وقت ملک میں مالی مشکلات، آئرس سسٹم کی سست رفتاری، مختلف علاقوں میں لوڈشیڈنگ اور ٹیکس پریکٹیشنرز، وکلاء اور چارٹرڈ اکاؤنٹنٹس پر بڑھتے ہوئے کام کے بوجھ کے باعث 15 اکتوبر تک مقررہ اہداف حاصل کرنا ممکن نہیں۔

انہوں نے مزید کہا کہ ٹیکس گوشواروں کی تیاری، بینکوں میں ٹیکس جمع کرانے کے لیے سی پی آر این تیار کرنے اور آئرس سسٹم پر فائل کرنے کا عمل وقت طلب ہے، اس لیے ٹیکس دہندگان کو سہولت دینے کے لیے حکومت کو ایک ماہ کی اضافی مہلت دینی چاہیے۔

جاوید قاضی نے کہا کہ ملک بھر سے ٹیکس ماہرین کی جانب سے اس حوالے سے پیغامات موصول ہو رہے ہیں جن میں وزیراعظم سے اپیل کی گئی ہے کہ عوامی مشکلات کے ازالے اور ایف بی آر کے مالیاتی اہداف کے حصول کے لیے گوشوارے جمع کرانے کی تاریخ 30 نومبر تک بڑھا دی جائے۔

کاپی رائٹ بزنس ریکارڈر، 2025