خیبر پختونخوا کی حکمران جماعت پی ٹی آئی نے سہیل آفریدی کو وزیرِاعلیٰ کے منصب کے لیے نامزد کیا ہے، مگر یہ فیصلہ جتنا سادہ دکھائی دیتا ہے، اتنا ہی پیچیدہ بھی ہے۔

آج نیوز کے مطابق خیبر پختونخوا کے گورنر فیصل کریم کنڈی کو علی امین گنڈاپور کا استعفیٰ موصول ہو گیا ہے۔ منظوری کے بعد، گورنر اسمبلی کا اجلاس طلب کریں گے، جس میں موجودہ حکومت کے تحلیل ہونے اور نئے وزیرِاعلیٰ کے انتخاب کا باقاعدہ عمل شروع ہو گا،۔

اب سوال یہ ہے کہ کیا پی ٹی آئی آسانی سے اپنا ہی وزیرِاعلیٰ منتخب کر سکے گی؟

نمبر گیم

خیبر پختونخوا اسمبلی میں کل 124 نشستیں ہیں، اور وزیرِاعلیٰ منتخب ہونے کے لیے 73 ووٹ درکار ہیں۔

پی ٹی آئی کے کل اراکین کی تعداد 92 ہے، لیکن ان میں سے 35 آزاد حیثیت رکھتے ہیں، جس کا مطلب ہے کہ وہ قانونی طور پر پی ٹی آئی کی ہدایات کے پابند نہیں۔ مزید یہ کہ 22 اراکین کے حلف نامے جمع کرانے کی اطلاعات ہیں، جو پارٹی کے اندرونی اختلافات کی نشاندہی کرتی ہیں۔

دوسری جانب اپوزیشن کے پاس 53 اراکین ہیں، اور اگر وہ مزید 20 ووٹ حاصل کر لیتی ہے، تو صورتحال پلٹ سکتی ہے۔ اپوزیشن جماعتوں کی قیادت پاکستان مسلم لیگ (ن) کے رکنِ اسمبلی ڈاکٹر عباداللہ خان کر رہے ہیں، جنہوں نے مشترکہ امیدوار کے انتخاب پر اتفاق رائے کے لیے ہنگامی اجلاس طلب کیا ہے۔

سیاسی ملاقاتیں

سہیل آفریدی، جو متوقع طور پر اگلے وزیرِاعلیٰ ہوں گے، گزشتہ 28 گھنٹوں سے اتحادیوں کی حمایت حاصل کرنے کے لیے سرگرم ہیں۔ انہوں نے اسمبلی اسپیکر بابر سلیم، وزرا اور پارٹی رہنماؤں سے ملاقاتیں کی ہیں۔ پارٹی قیادت کی خواہش ہے کہ تمام اراکین کو سہیل آفریدی کے حق میں قائل کیا جائے تاکہ ووٹوں کی تقسیم سے بچا جا سکے۔

دوسری جانب اپوزیشن بھی سرگرم ہے۔ اپوزیشن جماعتیں آزاد اراکین سے رابطے میں ہیں اور ممکنہ طور پر ایسا اتحاد بنانے کی کوشش کر رہی ہیں جو پی ٹی آئی کی اکثریت کو چیلنج کر سکے۔

اگر آزاد اراکین نے اپوزیشن کا ساتھ دیا، تو صورتحال ڈرامائی طور پر بدل سکتی ہے۔

موجودہ حالات کو دیکھتے ہوئے یہ کہا جا سکتا ہے کہ یہ انتخاب 36 سالہ پی ٹی آئی امیدوار کے لیے ایک کڑا امتحان ثابت ہوگا۔ پی ٹی آئی کے اندرونی اختلافات، آزاد اراکین کی پوزیشن، اور اپوزیشن کی ووٹ مینجمنٹ — سب مل کر یہ طے کریں گے کہ اگلا وزیرِاعلیٰ کون ہوگا۔

سہیل آفریدی کون ہیں؟

پی ٹی آئی نے خیبر ضلع سے پہلی بار منتخب ہونے والے رکنِ اسمبلی سہیل آفریدی کو علی امین گنڈاپور کی جگہ وزیرِاعلیٰ خیبر پختونخوا کے لیے نامزد کیا ہے۔

سہیل آفریدی، جو پی کے-70 سے منتخب ہوئے، پی ٹی آئی کی مرکزی ایگزیکٹو کمیٹی کے رکن ہیں اور ماضی میں انصاف اسٹوڈنٹس فیڈریشن (آئی ایس ایف) کے خیبر پختونخوا صدر بھی رہ چکے ہیں۔

موجودہ سیٹ اپ میں انہوں نے پہلے وزیرِاعلیٰ کے معاونِ خصوصی برائے مواصلات و تعمیرات کے طور پر خدمات انجام دیں، جس کے بعد وہ وزیرِاعلیٰ کے لیے اعلیٰ تعلیم کے وزیر مقرر ہوئے۔ سہیل آفریدی اپنی طویل وابستگی اور نوجوانوں کے ساتھ متحرک کردار کے باعث پارٹی کے اندر بتدریج ابھر کر نمایاں مقام حاصل کر چکے ہیں۔

راولپنڈی میں اس پیش رفت کی تصدیق کرتے ہوئے، پی ٹی آئی کے سیکریٹری جنرل سلمان اکرم راجہ نے بدھ کے روز کہا کہ پارٹی ایک نئے آغاز کی طرف بڑھ رہی ہے، اور اسمبلی سہیل آفریدی کو نیا وزیرِاعلیٰ منتخب کرے گی۔

سہیل آفریدی 12 جولائی 1989 کو خیبر ضلع میں پیدا ہوئے۔