ساتھ ہی سعودی عرب کے ساتھ تاریخی اسٹریٹجک باہمی دفاعی معاہدے کا خیرمقدم کیا گیا،جسے علاقائی سلامتی اور دفاعی تعاون کے فروغ کے لیے اہم سنگِ میل قرار دیا گیا۔

انٹر سروسز پبلک ریلیشنز (آئی ایس پی آر) کے مطابق جنرل ہیڈ کوارٹرز (جی ایچ کیو) میں چیف آف آرمی اسٹاف فیلڈ مارشل سید عاصم منیر کی زیر صدارت 272 ویں کور کمانڈرز کانفرنس منعقد ہوئی، جس میں انسدادِ دہشت گردی آپریشنز، علاقائی سلامتی کی صورتِ حال اور مسلح افواج کی آپریشنل تیاریوں کا تفصیلی جائزہ لیا گیا۔

فورم نے بھارتی سیاسی و عسکری قیادت کے اشتعال انگیز اور غیر ذمہ دارانہ بیانات پر شدید تشویش کا اظہار کرتے ہوئے خبردار کیا کہ سیاسی مقاصد کے لیے جنگی جنون کو ہوا دینا خطے کے امن کے لیے خطرہ بن سکتا ہے۔

کمانڈروں نے واضح کیا کہ بھارت کے کسی بھی خیالی نئے معمول کا سامنا فوری اور مؤثر ردِعمل کے نئے معمول سے کیا جائے گا۔

اجلاس میں دہشت گردی کے خلاف جامع کارروائیوں کو مزید تیز کرنے کے عزم کا بھی اظہار کیا گیا، جن میں بھارت کی سرپرستی میں سرگرم پراکسیز، فتنہ الخوارج اور فتنہ الہندستان شامل ہیں۔ فورم نے کہا کہ دہشت گردی، جرائم اور سیاسی سرپرستی کا گٹھ جوڑ ریاستی سلامتی کے لیے سنگین خطرہ ہے اور اسے کسی صورت برداشت نہیں کیا جائے گا۔

آئی ایس پی آر کے مطابق کانفرنس کا ایک اہم پہلو سعودی عرب کے ساتھ حالیہ اسٹریٹجک باہمی دفاعی معاہدے کی توثیق تھا۔ فورم نے اس معاہدے کو تاریخی سنگِ میل قرار دیتے ہوئے کہا کہ یہ دونوں ممالک کے درمیان دفاعی تعاون کو مزید مضبوط اور کسی بھی بیرونی جارحیت کے مشترکہ ردِعمل کو یقینی بنائے گا۔

بیان میں مزید کہا گیا کہ معاہدہ مشرقِ وسطیٰ اور جنوبی ایشیا میں امن، استحکام اور باہمی احترام کے مشترکہ وژن کی عکاسی کرتا ہے۔

فورم نے کشمیر اور فلسطین کے حوالے سے پاکستان کے دوٹوک اور اصولی مؤقف کا اعادہ کیا۔

بیان میں کشمیری عوام کے حقِ خودارادیت کی حمایت اور غزہ میں فوری جنگ بندی کے ساتھ القدس الشریف کو دارالحکومت بنا کر 1967 سے قبل کی سرحدوں پر مبنی آزاد فلسطینی ریاست کے قیام کا مطالبہ کیا گیا۔

اختتامی کلمات میں آرمی چیف فیلڈ مارشل عاصم منیر نے کمانڈروں کو ہدایت کی کہ وہ تمام ممکنہ خطرات روایتی، غیر روایتی، ہائبرڈ یا غیر متناسب سے نمٹنے کے لیے اعلیٰ درجے کی آپریشنل تیاری، نظم و ضبط اور جدت برقرار رکھیں۔

انہوں نے دہشت گردی کے خلاف افواجِ پاکستان کی قربانیوں اور کردار کو قابلِ تحسین قرار دیا۔