وزارتِ خارجہ کے ایک سرکاری بیان میں کہا گیا ہے کہ پاکستان نے بین الاقوامی شراکت داروں سے رابطہ قائم کر لیا ہے تاکہ گرفتار شہریوں کی سلامتی اور خیریت کو یقینی بنایا جا سکے۔

گرفتار افراد میں سابق سینیٹر مشتاق احمد بھی شامل ہیں، جن کے بارے میں تصدیق کی گئی ہے کہ وہ اسرائیلی حراست میں محفوظ اور خیریت سے ہیں۔

وزارتِ خارجہ کے مطابق، مشتاق احمد کو قانونی تقاضوں کے مطابق ایک مقامی عدالت میں پیش کیا جائے گا، اور ڈیپورٹیشن آرڈر جاری ہونے کے بعد ان کی پاکستان واپسی کے عمل میں تیزی آنے کی توقع ہے۔

بیان میں مزید کہا گیا کہ حکومت نے اس سے قبل اُن پاکستانی شہریوں کی محفوظ واپسی میں بھی معاونت کی تھی جنہوں نے رضاکارانہ طور پر فلوٹیلا سے علیحدگی اختیار کی تھی۔ وزارتِ خارجہ نے اس سلسلے میں تعاون فراہم کرنے والے دوست ممالک کا شکریہ بھی ادا کیا۔

بیان کے مطابق پاکستانی حکومت اپنے تمام شہریوں کے تحفظ کے لیے پرعزم ہے، اور توقع ہے کہ ان کی واپسی کا عمل آنے والے دنوں میں مکمل ہو جائے گا۔