اقوام متحدہ میں پاکستان کے مستقل مندوب عاصم افتخار احمد نے جنرل اسمبلی میں اپنے بیان میں امید ظاہر کی کہ ایسے اقدامات سب سے زیادہ درکار نتائج فراہم کرنے میں مددگار ثابت ہو سکتے ہیں۔

جنرل اسمبلی کے اجلاس ویٹو ڈیبیٹ (فلسطینی سوال) میں عاصم افتخار نے فوری جنگ بندی، جنگ کے خاتمے، بلا رکاوٹ انسانی ہمدردی کی امداد کی فراہمی اور سب سے بڑھ کر فلسطینی ریاست کے قیام کے لیے ایک بااعتماد سیاسی افق کی ضرورت پر زور دیا۔

انہوں نے کہا کہ پاکستان ان مشاورتوں کا حصہ بن کر یہ یقینی بنائے گا کہ ان کوششوں کو وعدوں سے نہیں بلکہ نتائج سے پرکھا جائے۔

انہوں نے مطالبہ کیا کہ قتل و غارت بند کی جائے، قبضے کا خاتمہ کیا جائے، خاندانوں کو دوبارہ ملایا جائے، غزہ کو دوبارہ تعمیر کیا جائے اور فلسطینی عوام کے تحفظ اور وقار کی ضمانت دی جائے۔

انہوں نے کہا کہ فلسطینی عوام اپنی تقدیر کے خود مالک ہیں اور ان کی تقدیر آزادی ہے۔ انہیں مزید ان کے حق خود ارادیت سے محروم نہیں رکھا جا سکتا۔ امن کو اب مزید مؤخر نہیں کیا جا سکتا۔

پاکستانی مندوب نے کہا کہ جب اقوام متحدہ کی سلامتی کونسل کے منتخب اراکین نے قرارداد پیش کی تو یہ محض سفارت کاری نہیں تھی بلکہ ایک فوری کوشش تھی تاکہ بمباری، ملبے، قحط اور مایوسی میں پھنسے ہوئے فلسطینی عوام کی پکار کا جواب دیا جا سکے۔ تاہم، انہوں نے کہا کہ ویٹو کی وجہ سے کونسل کا آگے نہ بڑھ پانا انتہائی مایوس کن ہے۔

انہوں نے مزید کہا کہ تباہی کے باوجود ضمیر کی آوازیں بلند ہو رہی ہیں۔ ٹو اسٹیٹ سلوشن کانفرنس کے تناظر میں، مزید ریاستوں کی جانب سے فلسطین کی تسلیم شدگی، اور دنیا بھر میں جنگ بندی اور فلسطینی مسئلے کے پائیدار حل کے لیے بڑھتی ہوئی آوازیں ایک امید کی کرن ہیں۔