وفاقی رجسٹر میں بدھ کی دوپہر شائع ہونے والی دستاویزات کے مطابق یہ تحقیقات دو ستمبر کو شروع کی گئی تھیں اور ان کے نتیجے میں ان صنعتوں کی فہرست مزید وسیع ہو سکتی ہے جن پر صدر ڈونلڈ ٹرمپ نئے محصولات عائد کر سکتے ہیں۔

امریکی محکمۂ تجارت نے ان دونوں معاملات پر عوامی رائے طلب کی ہے۔

یہ تحقیقات 1962 کے ٹریڈ ایکسپینشن ایکٹ کی دفعہ 232 کے تحت کی جا رہی ہیں، وہی اختیار جس کے تحت صدر ڈونلڈ ٹرمپ نے حال ہی میں اسٹیل، ایلومینیم اور آٹوموبائلز کی درآمدات پر بھاری محصولات عائد کیے تھے۔

یہ عمل عموماً کئی ماہ میں مکمل ہوتا ہے اور اگر حکام اسے قومی سلامتی کے لیے ضروری سمجھیں تو اس کے نتیجے میں نئے ٹیرف یا دیگر اقدامات متعارف کرائے جا سکتے ہیں۔

طبی آلات سے متعلق تحقیقات میں ذاتی حفاظتی سامان (پی پی ای)، میڈیکل کنزیوم ایبلز اور طبی آلات بشمول ڈیوائسز کی درآمدات کے قومی سلامتی پر اثرات کا جائزہ لیا جا رہا ہے۔

پی پی ای میں سرجیکل ماسک، دستانے اور گاؤن جیسے اشیا شامل ہیں، جب کہ کنزیوم ایبلز میں سرنج وغیرہ جیسے سامان آتے ہیں، تاہم اس میں دواسازی کی مصنوعات شامل نہیں ہیں۔

تحقیقات کا دائرہ کار وہیل چیئر سے لے کر پیس میکر تک وسیع تر مصنوعات کو بھی محیط ہے۔

علیحدہ طور پر، صنعتی مشینری سے متعلق تحقیقات میں روبوٹس، ملنگ مشینیں، صنعتی اسٹیمپنگ اور پریسنگ مشینوں سمیت دیگر اشیا کو شامل کیا گیا ہے۔

کچھ مخصوص نوعیت کے میٹل ورکنگ آلات بھی اس دائرے میں آتے ہیں، تاہم ڈرونز کو الگ سے زیر غور رکھا جا رہا ہے۔

امریکی حکومت نے حالیہ عرصے میں دواسازی، ڈرونز اور سیمی کنڈکٹرز سمیت مختلف مصنوعات پر اسی نوعیت کی تحقیقات شروع کی ہیں۔

تاہم ٹرمپ کے شعبہ وار محصولات ان محصولات سے الگ ہیں جو انہوں نے مخصوص ممالک اور معیشتوں سے درآمدات پر عائد کیے ہیں۔

اس برس وائٹ ہاؤس واپسی کے بعد، ٹرمپ نے تقریباً تمام تجارتی شراکت داروں سے ہونے والی درآمدات پر دس فیصد ڈیوٹی عائد کر دی۔

اگست میں انہوں نے اس شرح کو درجنوں شراکت داروں کے لیے مختلف سطحوں پر بڑھایا، جس سے یورپی یونین، جاپان، بھارت اور دیگر اہم معیشتیں متاثر ہوئیں۔