صدر ٹرمپ نے وائٹ ہاؤس بریفنگ میں کہا کہ ہمارا ٹک ٹاک پر معاہدہ ہوگیا ہے۔ چند بڑی کمپنیاں اسے خریدنا چاہتی ہیں۔‘ تاہم مزید تفصیلات فراہم نہیں کی گئیں۔ یہ اعلان اس وقت سامنے آیا جب ٹک ٹاک کی فروخت یا بندش کی آخری تاریخ 17 ستمبر مقرر تھی، تاہم وائٹ ہاؤس نے اس ڈیڈلائن کو بڑھا کر 16 دسمبر کر دیا۔

رپورٹس کے مطابق نئے معاہدے کے تحت ٹک ٹاک کے امریکی اثاثے ایک نئی کمپنی کو منتقل ہوں گے، جس کا زیادہ تر حصہ امریکی سرمایہ کاروں کے پاس ہوگا، جبکہ بائٹ ڈانس 19.9 فیصد حصص برقرار رکھے گا۔ بقیہ 80 فیصد شیئرز امریکی اور دیگر سرمایہ کاروں، بشمول جنرل اٹلانٹک، کے کے آر، سسکویہ انٹرنیشنل گروپ اور نئے سرمایہ کاروں کو دیے جائیں گے۔ اوریکل اور سلور لیک بھی اس میں حصہ لینے کے خواہاں ہیں۔

امریکی وزیر خزانہ اسکاٹ بیسنٹ کے مطابق اس معاہدے کی تجارتی شرائط مارچ سے ہی طے پا چکی تھیں، صرف چند نکات باقی تھے۔ انہوں نے کہا کہ یہ ڈیل امریکی قومی سلامتی کے تقاضوں کو پورا کرتی ہے اور بظاہر چین کے مفادات کو بھی مدنظر رکھتی ہے۔

تجزیہ کاروں کا کہنا ہے کہ یہ معاہدہ دونوں بڑی معیشتوں کے درمیان جاری تجارتی کشیدگی کو کم کرنے میں مدد دے سکتا ہے۔ حتمی اعلان صدر ٹرمپ اور چینی صدر شی جن پنگ کے درمیان جمعہ کو ہونے والی کال میں متوقع ہے۔