تدفینی رسومات خاموشی سے قذافی اسٹیڈیم میں ادا کی جائیں گی، جہاں حیران و پریشان شائقین موجود ہوں گے — کئی اب بھی 1992 کی وی ایچ ایس ٹیپوں کو (شاید نہیں بھی) مقدس نشانیوں کی طرح تھامے ہوئے۔

موت کی فوری وجہ کارکردگی کا ایسا انہدام تھا جو پاکستان کے پسندیدہ مشغلے سے مطابقت رکھتا ہے: فتح کو شکست میں بدلنے کا فن۔ مگر بنیادی بیماریاں دہائیوں سے پل رہی تھیں۔

ٹیم کا نظامِ حکمرانی ایک گھومتے دروازے جیسا تھا — 15 سال میں 11 چیئرمین، بے شمار کپتان، اور ایڈہاک کمیٹیاں جو محض ڈرپ کے ذریعے مریض کو نیم جان حالت میں زندہ رکھتی رہیں۔

گزشتہ 12 ماہ ہی مرثیے کو مکمل کرنے کے لیے کافی تھے۔ ٹی ٹوئنٹی ورلڈ کپ میں امریکہ کے ہاتھوں حیران کن شکست۔ افغانستان کے خلاف مسلسل ہاریں، جسے کبھی پاکستان کرکٹ کا شاگرد سمجھا جاتا تھا۔ اور پھر گھر میں بنگلہ دیش کے ہاتھوں وائٹ واش — ایک ایسا منظر جو کچھ عرصہ پہلے تک ناقابلِ تصور تھا۔

ہر شکست اب حادثہ نہیں بلکہ معمول بن گئی۔ یہ صرف فارم کا نہیں بلکہ مکمل زوال کا معاملہ تھا۔ پاکستان کرکٹ اپنی روایتی ان دیکھی کرشمہ سازی سے مستقل اوسط درجے کی ٹیم میں بدل گئی — ایسی ٹیم جس سے حریف اب ڈرتے نہیں بلکہ جیت کی توقع رکھتے ہیں۔

کوئی بھی مرثیہ اس وقت تک مکمل نہیں ہو سکتا جب تک مقامی ڈھانچے کی مستقل اکھاڑ پچھاڑ کا ذکر نہ ہو۔ پچھلے دس سال میں پاکستان کی فرسٹ کلاس کرکٹ کا کوئی ایک بھی سیزن ایسا نہیں تھا جو اگلے سال بھی اسی ڈھانچے کے ساتھ جاری رہتا۔

ریجنز کو ڈیپارٹمنٹس سے بدلا گیا، پھر واپس لایا گیا، پھر دوبارہ چھیڑ چھاڑ کی گئی — سب کچھ اس پر منحصر رہا کہ اس وقت پی سی بی کی کرسی پر کون بیٹھا تھا۔ دوسری قومیں مستقل مزاجی سے ٹیلنٹ کی نرسریاں تیار کرتی رہیں جبکہ پاکستان نے مقامی کرکٹ کو تجرباتی کھیل کا میدان بنا دیا، جس نے نوجوان کھلاڑیوں کو کسی مستحکم نظام میں نشوونما پانے کا موقع ہی نہ دیا۔ نتیجہ: ضائع شدہ صلاحیتوں کی ایک فیکٹری کی صورت میں نکلا۔

1952 میں جنم لینے والی پاکستان کرکٹ کی جوانی ناقابلِ فراموش تھی۔ اس نے دنیا کو فضل محمود، عمران خان، وسیم اکرم، وقار یونس، سعید انور جیسے نام دیے — کچی مگر شاندار صلاحیتوں کی فیکٹری۔ 1992 میں عمران کی قیادت میں ٹیم نے ایورسٹ سر کر لیا۔

2009 کے ٹی ٹوئنٹی ورلڈ کپ نے یاد دلایا کہ شعلہ مکمل بجھا نہیں تھا۔ لیکن 2010 اور 2020 کی دہائیوں نے ثابت کر دیا کہ کبھی کبھار کی چمک ادارہ جاتی طاقت کا نعم البدل نہیں ہو سکتی۔ دوسری قوموں نے نظام بنائے؛ پاکستان نے دعاؤں، یادوں اور قدرت کا نظام کی مینجمنٹ پر بھروسہ کیا۔

دہائیوں تک کرکٹ واحد کھیل تھا جو ہاکی کی موت کے بعد بھی پاکستانیوں کو متحد رکھتا رہا۔ مگر اب یہ رشتہ بھی کمزور ہو رہا ہے۔ ہر شرمناک شکست کے ساتھ مزید شائقین بددل ہو رہے ہیں۔ ایک ایسے ملک میں جہاں کرکٹ ثقافتی طور پر حد سے زیادہ اہمیت رکھتا ہے، خطرہ صرف کھیل میں تنزلی کا نہیں بلکہ فخر کی آخری قومی علامت کے ٹوٹنے کا بھی ہے۔

حریف پھلے پھولے۔ بھارت کرکٹ کا ایپل بن گیا — امیر، منظم، جدت پسند اور مستقل مزاج۔

یہاں تک کہ افغانستان ایک پھرتیلا اسٹارٹ اپ بن کر ابھرا، جس نے اپنے تجربہ کار پڑوسی کو نظم و ضبط اور جدید کوچنگ کے ذریعے پیچھے چھوڑ دیا۔ جبکہ پاکستان ایک پرانا برانڈ لگا جو واک مین کے زمانے سے آگے نہ بڑھ سکا، بس امید رکھتا رہا کہ اس کا کرشمہ آئی فون کو بھی مات دے گا۔ آئی سی سی رینکنگ پوری کہانی بیان کرتی ہے۔

2025 کے وسط تک پاکستان تینوں فارمیٹس میں ٹاپ فائیو سے باہر تھا، جیت کے تناسب ایسے کہ کاؤنٹی کی درمیانی ٹیم بھی شرمائے۔ مالی طور پر پی سی بی دوطرفہ سیریز پر انحصار کرتا رہا، خاص طور پر بھارت کے ساتھ — ایک ایسا رشتہ جو پاکستان کی مڈل آرڈر بیٹنگ کی طرح ناپید ہے۔

پاکستان کی ان فٹ کھلاڑیوں سے محبت مثالی بن گئی۔ یو-یو ٹیسٹ کو ہوم ورک کی طرح اختیاری سمجھا گیا۔ نیٹ پریکٹس اکثر کلب کرکٹ کی طرح لگتی تھی، نہ کہ ایلیٹ سطح کی تیاری۔ ٹیلنٹ کے ساتھ پی سی بی کا رشتہ واپڈا کی بجلی تقسیم جیسا تھا: نااہلی، رساؤ، اور کبھی کبھار چنگاریاں۔

اگر کرکٹ معاشرے کا عکس ہے تو پاکستان کرکٹ کا مرثیہ ملک کی معاشی رپورٹ جیسا ہے۔ غیر مستقل پالیسیاں؟ چیک لگائیں ،سیاسی تقرریاں میرٹ پر غالب؟ ڈبل چیک لگائیں مختصر عروج، طویل جمود؟ ٹرپل چیک لگائیں، پاکستان کرکٹ پی آئی اے کی طرح ہے، بس پیڈز پہن کر — ایک تنبیہی کہانی کہ ادارے جب سڑ جاتے ہیں تو کیا ہوتا ہے۔

اگرچہ احیاء کے منصوبے اور پانچ سالہ حکمتِ عملی کے بیانات آئی ایم ایف قرضہ درخواستوں کی طرح باقاعدگی سے جاری ہوتے رہتے ہیں، مگر پیش گوئی اب بھی تاریک ہے۔ پاکستان کرکٹ کو کسی نئے کرکٹ نابلد چیئرمین کی نہیں بلکہ نظامی اصلاح کی ضرورت ہے۔

قوم کو ماننا ہوگا کہ صرف ایک سخت ری سیٹ راستہ ہے — مقامی ڈھانچے کو مستحکم کرنا، میرٹ پر عملدرآمد، اور فٹنس و ڈسپلن کے لیے سنجیدگی۔ شائقین کو چار پانچ سال کی ہار کے لیے تیار رہنا ہوگا جب نظام دوبارہ تعمیر ہوگا۔ لیکن جب ویسے ہی جیت نہ ہو رہی ہو تو یہ سودا سودمند ہے۔ متبادل ہے دھیرے دھیرے اور ناقابلِ واپسی بے وقعتی — ایک ایسی موت جسے تدفین کا وقار بھی نہ ملے۔

پاکستان کرکٹ اپنے پیچھے ایک پرجوش مگر ہمیشہ دل شکستہ فین بیس، 1992 اور 2009 کی جھلملاتی یادوں، اور ایک پھولا ہوا انتظامی ڈھانچہ چھوڑ گیا ہے جو کسی طرح اس شے سے زیادہ زندہ رہ گیا جس کی خدمت کے لیے وجود میں آیا تھا۔ مرنے والے نے ایک پروان چڑھتی میم انڈسٹری بھی چھوڑی، جس کی تخلیقی صلاحیت اکثر بیٹنگ آرڈر سے زیادہ نمایاں رہی۔

یہاں دفن ہے پاکستان کرکٹ: انوکھا، دلکش، انتشار زدہ — اور آخرکار اپنی ہی عدم بلوغت کے ہاتھوں برباد۔