کاروباری حلقے جاننا چاہتے ہیں کہ سیلاب کے باعث، جس نے کھڑی فصلوں کا بڑا حصہ تباہ کردیا اور معیشت کو نقصان پہنچایا جو گزشتہ دو برسوں میں مستحکم ہونا شروع ہوگئی تھی، روپے کا مستقبل کیا ہوگا۔

ٹریژری فرم ٹریس مارک، ٹاپ لائن ریسرچ اور آئیکون مینجمنٹ کے مالیاتی ماہرین کا کہنا ہے کہ حالیہ معمولی فوائد پائیدار ہیں لیکن صرف قلیل مدتی طور پر۔ ان کا کہنا ہے کہ ملکی کرنسی ایک ماہ کے اندر 280 سے 281 روپے فی ڈالر کے قریب پہنچ کر رک سکتی ہے۔

ان کا ماننا ہے کہ مختصر استحکام کے بعد، روپیہ درمیانی سے طویل مدتی (تین سے نو ماہ) میں بتدریج گراوٹ کا شکار ہوگا، تاریخی اوسط شرح کے مطابق 5 فیصد-6 فیصد کی کمی کے ساتھ، خاص طور پر آنے والے آئی ایم ایف کے معاشی جائزے سے قبل ایسا ہوسکتا ہے۔

ٹریس مارک نے پیش گوئی کی کہ روپے-ڈالر کی شرح ایک ہفتے میں 281.60، ایک ماہ میں 281 اور تین ماہ میں 282.50 روپے فی ڈالر ہوگی۔

اس نے ملکی کرنسی کی سمت کو بیرون ملک مقیم پاکستانیوں کی ترسیلات زر کے ساتھ جوڑا، خاص طور پر ستمبر میں، اور نوٹ کیا کہ مالی سال 26 (جولائی-اگست) کے پہلے دو مہینوں میں ترسیلات کا بہاؤ سست رہا ہے۔

ٹریس مارک نے اپنی تازہ ترین ہفتہ وار رپورٹ میں کہا ہے کہ گزشتہ دو ہفتوں کے دوران فارن ایکسچینج لیکویڈیٹی میں بہتری آئی ہے۔ زیادہ تر بینک اب اپنی پوزیشن کو متوازن یا معمولی طور پر بہتر انداز میں رکھے ہوئے ہیں، جس سے تمام مدتوں میں سوآپ ریٹس اوپر گئے ہیں۔ اس رجحان نے ایکسپورٹرز کو فارورڈ سیلنگ کی طرف مائل کیا ہے، جس کے نتیجے میں لیکویڈیٹی کا ایک تسلسل پیدا ہوا ہے۔ ہمیں ڈالر-روپیہ ریٹ دونوں پالیسی ایونٹس کے دوران مستحکم دکھائی دے رہا ہے اور امکان ہے کہ ماہ کے اختتام تک یہ آہستہ آہستہ کم ہو کر 281 روپے فی ڈالر کی سطح تک آجائے۔

انہوں نے مزید کہا کہ اس کے بعد، رجحان ستمبر کی ترسیلات پر منحصر ہوگا۔ ہمارے پاس لگاتار دو ماہ کم ترسیلات رہی ہیں، اور یہ دیکھنا باقی ہے کہ آیا یہ ایک رجحان ہے یا صرف موسمی فرق۔

ترسیلات زر میں مالی سال 26 کے پہلے دو مہینوں میں مجموعی طور پر 7 فیصد اضافہ ہوا ہے، جو 6.4 بلین ڈالر تک پہنچا، پچھلے سال کے انہی مہینوں میں 5.9 بلین ڈالر کے مقابلے میں۔ تاہم، یہ جنوری-جون 2025 کے مہینوں کے مقابلے میں کم ہے۔

ٹاپ لائن ریسرچ کے سینئر تجزیہ کار شنکر تلریجا نے کہا کہ روپے کے قلیل مدتی طور پر مستحکم رہنے کی توقع ہے۔ تاہم، طویل مدتی میں ہم توقع کرتے ہیں کہ کرنسی جون 2026 کے آخر تک 5 سے 6 فیصد کی تاریخی شرح کے مطابق ڈی ویلیو ہوگی۔

انہوں نے ٹریس مارک سے اختلاف کیا اور کہا کہ اس وقت ترسیلات زر کے بہاؤ مضبوط ہیں اور بڑھتی ہوئی درآمدات کے دباؤ کو سنبھالنے کے لیے کافی ہیں۔ اس کے علاوہ، اسٹیٹ بینک بھی مارکیٹ سے ڈالر خریدنے کے قابل ہے۔ اس سے مستحکم کرنسی کا امکان ظاہر ہوتا ہے۔

انہوں نے مزید کہا کہ ہم نے بینکوں، فنڈز اور فیملی آفسز کے نمائندہ مالیاتی مارکیٹ کے شرکا سے ایک سروے کیا۔ ان میں سے زیادہ تر توقع کر رہے ہیں کہ کرنسی دسمبر تک 285 سے 290 روپے فی ڈالر کے درمیان رہے گی۔

سروے کے نتائج بتاتے ہیں کہ کرنسی جون 2026 تک 295 سے 300 روپے فی ڈالر تک گر سکتی ہے۔

اس دوران آئیکون مینجمنٹ کے سینئر تجزیہ کار حسن حیدر نے کہا کہ سیلاب اور متوقع 5 فیصد سے 7 فیصد سے زیادہ مہنگائی روپے-ڈالر کی برابری پر مالی سال 26 میں دباؤ ڈالے گی۔

کاروباری برادری، خاص طور پر ایکسپورٹرز، اسٹیٹ بینک سے مطالبہ کر رہے ہیں کہ پالیسی ریٹ کو موجودہ 11 فیصد سے سنگل ڈجٹ میں لائے اور/یا روپے کی ڈالر کے مقابلے میں قدر میں کمی کرے تاکہ منافع بڑھایا جا سکے۔

اسٹیٹ بینک آف پاکستان کی مانیٹری پالیسی کمیٹی (ایم پی سی) کا اجلاس آج (15 ستمبر) کو ہوگا، جس میں کلیدی پالیسی ریٹ کا فیصلہ کیا جائے گا۔ پچھلے اجلاس میں (30 جولائی 2025) کمیٹی نے پالیسی ریٹ کو 11 فیصد پر برقرار رکھا تھا۔

حسن حیدر کے مطابق مرکزی بینک دسمبر-جنوری تک پالیسی ریٹ کو برقرار رکھے گا۔ اس کے بعد یہ کمی کے بجائے شرح میں اضافہ کرنے پر غور کر سکتا ہے۔ اس صورت میں، پالیسی سازوں کو روپے کو گرانا پڑے گا تاکہ ایکسپورٹرز کے ڈالر کے بہاؤ کو مضبوط رکھا جا سکے اور بیرون ملک مقیم پاکستانیوں کو بہتر نرخوں کی تلاش میں غیر رسمی چینلز کے بجائے سرکاری چینلز کے ذریعے ترسیلات بھیجنے پر قائل کیا جا سکے۔

انہوں نے کہا کہ غیر ملکی کرنسی کے بہاؤ اس وقت مستحکم ہیں، کیونکہ تین ماہ کے فیوچرز کاؤنٹر پر ڈالرز کی فروخت پر پریمیم حال ہی میں 3.75 سے 4 روپے فی ڈالر تک بحال ہوگیا ہے۔ اس سے ظاہر ہوتا ہے کہ ایکسپورٹرز تین ماہ کے فیوچرز پر ڈالر 285 روپے میں بیچ رہے ہیں جبکہ ریڈی کاؤنٹرز پر 281.55 روپے پر فروخت ہورہے ہیں۔

یہ مستقبل کی شرح بھی درمیانی سے طویل مدت میں روپے کی بتدریج گراوٹ کی نشاندہی کرتی ہے، کیونکہ موجودہ اضافہ زیادہ سے زیادہ روپے کو 280 فی ڈالر تک لے جائے گا اور اس سے آگے نہیں۔

پریمیم میں نمایاں کمی عام طور پر ایکسپورٹرز کو انٹر بینک مارکیٹ میں ڈالر بیچنے سے عارضی طور پر روک دیتی ہے، کیونکہ انہیں اپنے خریداروں سے ایکسپورٹ پروسیڈز تین ماہ کے اندر وصول کرنے کی اجازت ہے۔

انہوں نے کہا کہ اعلیٰ پالیسی ریٹ اور/یا ڈالر کے مقابلے میں روپے کی اوسط کمی غیر ملکی براہ راست سرمایہ کاری (ایف ڈی آئی) اور مقامی ایکویٹی اور ڈیٹ مارکیٹس میں غیر ملکی سرمایہ کاری کو راغب کرنے کے لیے بھی ضروری ہے۔

آنے والا آئی ایم ایف ریویو، جس کے تحت 1 ارب ڈالر کی تیسری قسط جاری ہونا ہے، روپے-ڈالر کی شرح پر بھی اثر ڈال سکتا ہے، کیونکہ قرض دہندہ معاشی فوائد کو برقرار رکھنے کے لیے سخت پالیسیاں چاہتا ہے۔

امریکی مرکزی بینک کی جانب سے 17 ستمبر کو سود کی شرح میں 25 بیسز پوائنٹس کی ممکنہ کٹوتی عالمی سطح پر ڈالر کی فراہمی کو بڑھا دے گی۔ یہ بھی ڈالر-روپیہ کی قیمت کو متاثر کر سکتا ہے۔