سرکاری اعلامیے کے مطابق اجلاس میں سیکریٹری صنعت و پیداوار سیف انجم، اسمیڈا کے سی ای او سقراط امان رانا اور دیگر سینئر حکام نے شرکت کی۔ اجلاس میں وزیراعظم شہباز شریف کی ہدایات کی روشنی میں ادارے کی تنظیمِ نو پر بھی تفصیلی گفتگو ہوئی۔

ہارون اختر خان نے کہا کہ اسمیڈا کے نئے ڈھانچے میں آؤٹ سورسنگ ماڈلز، پالیسی سازی اور پروگرام ڈیزائن پر زور دیا گیا ہے۔ ترجیحی شعبہ جات میں چھوٹے اور درمیانے درجے کے کاروبار (ایس ایم ایز)، مائیکرو انٹرپرائزز، خواتین کاروباری افراد اور ماحولیاتی چیلنجز شامل ہیں۔

اجلاس میں گفتگو کرتے ہوئے ہارون اختر خان نے اعلان کیا کہ اسمیڈا آزاد جموں و کشمیر، بلوچستان اور گلگت بلتستان میں علاقائی دفاتر قائم کرے گا تاکہ مقامی سطح پر کاروباری ترقی کے مواقع کو فروغ دیا جا سکے۔

نئے سی ای او کی تقرری کے حوالے سے بورڈ نے فیصلہ کیا کہ ہیومن ریسورس کمیٹی کو انتخابی عمل کی نگرانی کا اختیار دیا جائے گا۔

ہارون اختر نے زور دیا کہ ”سی ای او کی تقرری مکمل طور پر میرٹ پر کی جائے گی اور شفافیت پر کوئی سمجھوتہ نہیں ہوگا۔“

انہوں نے کہا کہ ”اسمیڈا ایک کلیدی ادارہ ہے جس میں ترقی کی بے پناہ صلاحیت موجود ہے۔ وزیراعظم شہباز شریف اس ادارے کو مضبوط بنانے کے لیے ایک واضح وژن رکھتے ہیں اور ذاتی طور پر اس کی کامیابی سے وابستہ ہیں۔“ ان کا مزید کہنا تھا کہ خواتین اور مائیکرو انٹرپرائزز کو بااختیار بنانا ملک میں معاشی ترقی کا اہم ذریعہ بن سکتا ہے۔