پاکستان کے مالیاتی مرکز کراچی میں منگل اور بدھ کو ہونے والی شدید بارشوں کے دوران بیشتر کارخانے اور دفاتر بند رہے۔ جو یونٹس کھلے بھی تھے، وہاں ملازمین کی بڑی تعداد غیر حاضر رہی۔ شدید بارش، شہری سیلاب، سڑکوں کی بندش اور ٹرانسپورٹ کی کمی کے باعث کارکن ڈیوٹی پر نہ پہنچ سکے جس سے کئی کارخانے مکمل پیداوار جاری رکھنے میں ناکام رہے۔

برآمدی سامان کی ترسیل میں بھی تاخیر ہوئی کیونکہ سامان لانے والے ٹرک اور کنٹینرز سڑکوں اور ابلتے سیلابی نالوں کی وجہ سے حرکت نہیں کرسکے۔

شہر کی بڑی مارکیٹوں میں دکانداروں کو دکانیں بند کرنے پر مجبور ہونا پڑا کیونکہ خراب حالات میں کاروبار کرنا ناممکن ہوگیا تھا۔ نشیبی علاقوں میں واقع دکانیں اور گودام بارش اور گندے پانی میں ڈوب گئے جس سے مال کو شدید نقصان پہنچا۔

پانی میں ڈوبی سڑکیں، بجلی کی بندش، اُبلتے ہوئے نالے اور پبلک ٹرانسپورٹ کی عدم دستیابی نے معاشی سرگرمیوں کو مکمل طور پر مفلوج کر دیا۔ دکانداروں نے کاروبار بند کر دیا جبکہ ہزاروں ملازمین اپنے کام کی جگہوں تک نہ پہنچ سکے۔

بارشوں نے یومیہ اجرت پر کام کرنے والے مزدوروں کے لیے بھی سخت مشکلات پیدا کیں، جنہیں روزانہ کی آمدن نہ ملنے کے باعث اپنے گھروں کو خالی ہاتھ لوٹنا پڑا۔ منگل اور بدھ کے روز کاروبار اور مارکیٹوں کے متاثر ہونے کے بعد بڑی تعداد میں مزدور بے روزگار ہوگئے۔ اس کے علاوہ ترسیلِ سامان پر بھی بارش کے منفی اثرات پڑے، حادثات کے خطرات، گاڑیوں کی خرابی اور دیگر مسائل بڑھ گئے۔

کاپی رائٹ بزنس ریکارڈر، 2025