یہ فیصلہ اے ٹی سی کے جج منظر علی گل نے کوٹ لکھپت جیل میں 9 مئی کے فسادات کے دوران جناح ہاؤس کے قریب ایک سرکاری گاڑی کو جلانے سے متعلق کیس کے سلسلے میں سنایا ہے۔

فیصلے کے مطابق عدالت نے پی ٹی آئی رہنما روبینہ جمیل سمیت 39 ملزمان کا ٹرائل مکمل کیا، 18 کو سزا سنائی اور 21 کو بری کردیا ہے۔

10 سال قید کی سزا پانے والوں میں ڈاکٹر یاسمین راشد، سینیٹر اعجاز چوہدری، محمود الرشید اور پنجاب کے سابق گورنر عمر سرفراز چیمہ شامل ہیں۔ پی ٹی آئی کی کارکن خدیجہ شاہ کو پانچ سال قید کی سزا سنائی گئی ہے۔

یہ 9 مئی سے متعلقہ مقدمات میں حالیہ ہفتوں میں شاہ محمود قریشی کی دوسری بریت ہے۔ اس سے قبل انہیں شیرشاہ پل آتشزدگی کیس میں بری کر دیا گیا تھا جبکہ یاسمین راشد اور محمود الرشید کو اسی طرح اس کیس میں 10 سال قید کی سزا سنائی گئی تھی۔

بدعنوانی کے ایک کیس میں پی ٹی آئی کے بانی چیئرمین عمران خان کی گرفتاری کے بعد 9 مئی 2023 کو ملک بھر میں پھوٹ پڑنے والے پرتشدد مظاہروں میں مبینہ طور پر ملوث ہونے کے الزام میں پی ٹی آئی کے رہنماؤں کو متعدد مقدمات کا سامنا ہے۔

عمران خان جو 2023 سے جیل میں ہیں، کرپشن، زمین کی فراڈ اور سرکاری راز افشا کرنے کے الزامات کا سامنا کر رہے ہیں، ان پر بھی فسادات سے متعلق اسی طرح کے الزامات کے تحت الگ سے مقدمہ چلایا جا رہا ہے۔

حکومت نے ان پر اور پی ٹی آئی کے دیگر رہنماؤں پر 9 مئی 2023 کے احتجاج کو بھڑکانے کا الزام لگایا، جس کے دوران مظاہرین نے راولپنڈی میں آرمی ہیڈکوارٹر اور لاہور میں جناح ہاؤس سمیت عسکری اور سرکاری عمارتوں پر حملہ کیا۔

سابق وزیر اعظم نے کسی بھی غیر قانونی کام کرنے کی تردید کی ہے اور کہا ہے کہ تمام مقدمات ان کی پارٹی کو ختم کرنے کے لیے سیاسی طور پر بنائے گئے ہیں۔

الیکشن کمیشن آف پاکستان (ای سی پی) نے 5 اگست کو شبلی فراز، عمر ایوب اور زرتاج گل سمیت پی ٹی آئی کے متعدد پارلیمانی ارکان کے ساتھ ساتھ سنی اتحاد کونسل کے چیئرمین صاحبزادہ حامد رضا کو فیصل آباد میں اے ٹی سی کی جانب سے 9 مئی کے فسادات سے متعلق مقدمات میں سزا سنائے جانے کے بعد نااہل قرار دے دیا۔

ایک نوٹیفکیشن کے ذریعے الیکشن کمیشن نے اعلان کیا کہ چونکہ انہیں اے ٹی سی نے سزا سنائی تھی، اس لیے انہیں نااہل اور ڈی نوٹیفائی کیا گیا۔ اس لیے، ای سی پی نے کہا کہ مذکورہ پارلیمانی ارکان کی نشستیں خالی ہو گئی ہیں۔