قطر، جو مصر کے ساتھ مل کر تقریباً دو سال سے جاری غزہ میں اسرائیلی جارحیت کے دوران جنگ بندی کے مذاکرات میں ثالث کا کردار ادا کر رہا ہے، نے اس حملے کی شدید مذمت کرتے ہوئے اسے ”بزدلانہ“ قرار دیا اور بین الاقوامی قوانین کی کھلی خلاف ورزی کہا ہے۔

حماس کے دو ذرائع نے روئٹرز کو بتایا ہے کہ جنگ بندی مذاکراتی ٹیم کے حماس اہلکار اس حملے میں بچ گئے ہیں، جو غزہ شہر میں اسرائیل کی نسل کشی کی کارروائیوں کے دوران انخلا کے حکم کے بعد کیا گیا ہے۔

اسرائیلی حکام نے روئٹرز کو بتایا ہے کہ یہ حملہ حماس کے اعلیٰ رہنماوں، بشمول خلیل الحیہ، جو غزہ میں جلاوطن چیف اور سینئر مذاکرات کار ہیں، کو نشانہ بنانے کے لیے کیا گیا ہے۔

یہ حملہ جنگ بندی کے لیے جاری کوششوں کو سنگین نقصان پہنچا سکتا ہے، خاص طور پر اس لیے کہ مذاکرات قطر میں ہوئے تھے۔

متحدہ عرب امارات، جس نے 2020 میں ابراہم معاہدوں کے تحت اسرائیل کے ساتھ تعلقات معمول پر لائے تھے، نے دوحہ میں اسرائیلی حملے کو ”کھلی اور بزدلانہ“ جارحیت قرار دیا ہے۔

ابوظہبی پہلے ہی اسرائیلی وزیر کے مغربی کنارے کی الحاق کی منصوبہ بندی پر ناراض تھا اور کہہ چکا تھا کہ یہ ایک سرخ لکیر ہے جسے عبور نہیں کیا جا سکتا۔

علاقائی طاقت سعودی عرب نے قطر کی خودمختاری پر ہونے والی ”سخت اسرائیلی جارحیت“ کی شدید مذمت کی ہے۔

ایران نے قطر میں حماس رہنماؤں کو نشانہ بنانے والے حملوں کو “کھلی خلاف ورزی” قرار دیتے ہوئے اس کی شدید مذمت کی ہے۔

ایران کی وزارت خارجہ کے ترجمان اسماعیل بقائی نے ریاستی ٹی وی سے بات کرتے ہوئے کہا کہ “یہ انتہائی خطرناک اور مجرمانہ اقدام تمام بین الاقوامی قوانین اور ضوابط کی کھلی خلاف ورزی ہے اور قطر کی قومی خودمختاری اور علاقائی سالمیت کی خلاف ورزی بھی ہے۔” یہ رد عمل اس وقت سامنے آیا جب اسرائیل نے کہا کہ اس نے حماس رہنماؤں کو نشانہ بنایا ہے، مگر یہ واضح نہیں کیا کہ کہاں۔

قبل ازیں اسرائیلی فوجی ریڈیو کے مطابق اسرائیل نے منگل کو قطر میں حماس کے عہدیداروں کو نشانہ بنانے کی کوشش کی ہے۔

قطر کے الجزیرہ ٹی وی نے حماس کے ایک ذریعے کے حوالے سے کہا کہ یہ حملہ حماس کے غزہ میں جنگ بندی کے مذاکرات کاروں پر کیا گیا ہے۔

عینی شاہدین کے مطابق دوحہ میں منگل کے روز متعدد دھماکوں کی آوازیں سنائی دیں۔

اسرائیلی میڈیا نے ایک اعلیٰ اسرائیلی عہدیدار کے حوالے سے کہا ہے کہ حملے کا ہدف حماس کی اعلیٰ قیادت تھی، جن میں غزہ کے سربراہ خلیل الحیہ بھی شامل ہیں۔

ایک عینی شاہد نے بتایا کہ دارالحکومت کے کتارا ڈسٹرکٹ کے اوپر دھواں اٹھتا دیکھا گیا ہے۔

قطر کے وزیر اعظم کے مشیر اور وزارتِ خارجہ کے ترجمان ڈاکٹر ماجد الانصاری نے ایک بیان میں کہا ہے کہ ”ریاستِ قطر دوحہ میں حماس کے سیاسی بیورو کے کئی ارکان کے رہائشی عمارتوں کو نشانہ بنانے والے بزدلانہ اسرائیلی حملے کی سخت مذمت کرتی ہے۔“

“یہ مجرمانہ حملہ تمام بین الاقوامی قوانین اور اصولوں کی کھلی خلاف ورزی ہے اور قطر کے شہریوں اور وہاں مقیم افراد کی سلامتی کے لیے سنگین خطرہ ہے۔ وزارت نے اس بات کی تصدیق کی کہ سیکورٹی فورسز، سول ڈیفنس اور متعلقہ اداروں نے فوراً واقعے سے نمٹنے، اس کے اثرات کو محدود کرنے اور رہائشیوں و اردگرد کے علاقوں کی حفاظت یقینی بنانے کے لیے اقدامات شروع کر دیے۔

ریاستِ قطر اس حملے کی سخت مذمت کرتے ہوئے یہ واضح کرتی ہے کہ وہ اسرائیل کے اس غیر ذمہ دارانہ رویے اور خطے کے امن میں مسلسل خلل ڈالنے کے اقدامات کو برداشت نہیں کرے گی، نہ ہی اپنی سلامتی اور خودمختاری کو نشانہ بنانے والی کسی کارروائی کو۔ اعلیٰ سطح پر تحقیقات جاری ہیں اور جیسے ہی مزید تفصیلات سامنے آئیں گی، ان کا اعلان کیا جائے گا۔”