ریلوے کمپنی کینیڈین پیسفک کانساس سٹی ڈی میکسیکو کے مطابق بس ٹرین کے آگے سے گزرنے کی کوشش کر رہی تھی جس کے باعث یہ حادثہ پیش آیا۔ کمپنی نے ہلاکتوں پر افسوس کا اظہار کرتے ہوئے ڈرائیورز سے اپیل کی ہے کہ ریلوے کراسنگ پر لگے اشاروں اور ہدایات پر عمل کریں۔

حادثہ اٹلا کومولکو اور مراواتیو کے درمیان ہائی وے کے صنعتی علاقے میں پیش آیا، جو میکسیکو سٹی سے تقریباً 115 کلومیٹر شمال مغرب میں واقع ہے۔ مقامی حکام کے مطابق مرنے والوں میں سات خواتین اور تین مرد شامل ہیں۔ ریاستی اٹارنی جنرل کے دفتر نے بتایا کہ زخمیوں میں کچھ کی حالت تشویشناک ہے جبکہ بعض کو ابتدائی طبی امداد کے بعد اسپتال سے فارغ کردیا گیا۔

تصاویر میں دیکھا جا سکتا ہے کہ بس کی اوپری منزل کا اگلا حصہ بری طرح تباہ ہوگیا اور لوہے کا فریم مڑ گیا۔

میکسیکو اور لاطینی امریکا میں مہلک بس حادثات عام ہیں۔ صرف 2023 میں وفاقی شاہراہوں پر 12,099 ٹریفک حادثات رپورٹ ہوئے جن میں قریب 1,900 افراد جان سے گئے۔ فروری میں بھی جنوبی میکسیکو میں ایک بس ٹریلر سے ٹکرا کر آگ لگنے سے 40 سے زائد افراد ہلاک ہوگئے تھے۔

بسیں میکسیکو میں سفر کا بڑا ذریعہ ہیں، جبکہ صدر کلاؤڈیا شین بام کی حکومت مسافر ریل نیٹ ورک کے توسیعی منصوبے پر کام کر رہی ہے۔