ٹی وی خطاب میں پیڈرو سانچیز نے کہا کہ یہ اقدامات غزہ میں نسل کشی کو روکنے، اس کے ذمہ داروں کو انصاف کے کٹہرے میں لانے اور فلسطینی عوام کی مدد کے لیے ہیں۔ ان کا کہنا تھا کہ بائیں بازو کی حکومت اسرائیل کے ساتھ اسلحہ کی خرید و فروخت پر پہلے سے عائد پابندی کو قانون کا حصہ بنانے کے لیے نیا فرمان جاری کرے گی۔ اسی طرح اسرائیلی فوج کے لیے ایندھن لے جانے والے جہاز اسپینی بندرگاہوں پر نہیں رک سکیں گے جبکہ فضائی راستے سے اسلحے کی ترسیل بھی محدود کی جائے گی۔

وزیراعظم نے مزید کہا کہ تمام وہ افراد جو غزہ میں نسل کشی، انسانی حقوق کی خلاف ورزیوں اور جنگی جرائم میں براہِ راست شریک ہیں انہیں اسپین میں داخلے پر پابندی ہوگی۔ اسپین نے فلسطینی علاقوں میں قائم غیر قانونی آبادکاریوں سے مصنوعات کی درآمد پر بھی پابندی عائد کرنے کا فیصلہ کیا ہے تاکہ فلسطینی آبادی کو زبردستی بے دخل کرنے کے عمل کو روکا جا سکے۔

پیڈرو سانچیز نے فلسطینی اتھارٹی کے ساتھ زراعت، خوراک کی سیکیورٹی اور طبی امداد کے نئے منصوبوں کے علاوہ فلسطینی عوام کے لیے اضافی انسانی ہمدردی کی فنڈنگ کا بھی اعلان کیا۔ وہ یورپ کے ان چند رہنماؤں میں شامل ہیں جنہوں نے کھل کر اسرائیلی کارروائی کو نسل کشی قرار دیا۔

یاد رہے کہ 7 اکتوبر 2023 کو حماس کے حملے میں 1,219 اسرائیلی شہری ہلاک ہوئے تھے، جبکہ جوابی کارروائی میں اب تک غزہ میں کم از کم 64,368 فلسطینی شہید ہو چکے ہیں جن میں زیادہ تر عام شہری شامل ہیں۔