دن کا آغاز وفاقی دارالحکومت میں 31 اور صوبائی دارالحکومتوں میں 21 توپوں کی سلامی سے کیا گیا۔ نماز فجر کے بعد ملک و ملت کی ترقی و خوشحالی اور امت مسلمہ کے اتحاد کے لیے خصوصی دعائیں مانگی گئیں۔

صدر آصف علی زرداری نے قوم اور امت مسلمہ کو 12 ربیع الاول کی مبارکباد دیتے ہوئے کہا ہے کہ یہ بابرکت اور تاریخی موقع امت کے لیے خوشی اور عقیدت کا باعث ہے۔ انہوں نے کہا کہ 1500 ویں سالگرہ ہمیں پیغام دیتی ہے کہ ہم اپنی سماجی، سیاسی اور ثقافتی زندگی میں حضور ﷺ کے آفاقی اصولوں، عدل، رحمت، اخوت اور امن، کو اپنائیں۔

وزیراعظم شہباز شریف نے اس موقع پر قوم سے عہد کی تجدید کا مطالبہ کیا کہ پاکستان کو سیرت النبی ﷺ کی تعلیمات کے مطابق استوار کیا جائے اور اتحاد، انصاف، ہمدردی و امن کو فروغ دیا جائے۔

وزیراعظم نے اپنے پیغام میں کہا کہ تقریباً پندرہ سو برس قبل مکہ مکرمہ کی مقدس سرزمین پر حضور نبی اکرم ﷺ کی ولادت باسعادت نے دنیا کو منور کیا، تاریکی کو اجالے میں بدلا اور تمام انسانیت کے لیے عدل، رحمت، مساوات اور اتحاد کی نئی راہیں متعین کیں۔

انہوں نے کہا کہ اس برس پاکستان سمیت دنیا بھر کے مسلمان حضور اکرم ﷺ کی 1500 ویں ولادت باسعادت کو ”سالِ رحمت للعالمین“ کے طور پر منا رہے ہیں۔

وزیراعظم نے مزید کہا کہ حضور اکرم ﷺ کی زندگی زندگی کے تمام پہلوؤں، حکمرانی، عدل، معیشت، تجارت اور سماجی اقدار، کے لیے ایک کامل اور جامع نمونہ ہے۔