دورے کے دوران وزیراعظم کی چینی صدر شی جن پنگ اور وزیراعظم لی چیانگ سے ملاقاتیں متوقع ہیں، جن میں سیاسی، اقتصادی اور سیکورٹی تعاون کے مختلف پہلوؤں پر تبادلہ خیال کیا جائے گا۔

وزیراعظم شہباز شریف بیجنگ میں منعقدہ دوسری جنگِ عظیم میں فاشزم کے خلاف عالمی جدوجہد کی 80ویں سالگرہ کے موقع پر ہونے والی فوجی پریڈ میں بھی شرکت کریں گے، جہاں وہ صدر شی جن پنگ اور دیگر عالمی رہنماؤں کے ہمراہ ہوں گے۔

وزیراعظم شہباز شریف اپنے دورۂ چین کے دوران چینی کاروباری شخصیات اور کمپنیوں کے سربراہان سے ملاقات کریں گے، جس میں تجارت اور سرمایہ کاری کے مواقع زیرِ غور آئیں گے۔ وہ بیجنگ میں منعقد ہونے والی پاکستان چین بزنس ٹو بزنس (بی ٹو بی) انویسٹمنٹ کانفرنس سے خطاب بھی کریں گے۔

وزیراعظم کا یہ دورہ پاک چین اعلیٰ سطح کے روابط کے تسلسل کا حصہ ہے، جس کا مقصد چین پاکستان اقتصادی راہداری ( سی پیک) کے دوسرے مرحلے کو آگے بڑھانا، دونوں ممالک کے درمیان ہر موسم کی آزمودہ شراکت داری کو مزید مستحکم کرنا اور علاقائی و عالمی امور پر قریبی مشاورت و ہم آہنگی کو فروغ دینا ہے۔