اسرائیلی فوج نے بیان میں کہا کہ نشانہ بنائے گئے مقامات میں صدارتی محل پر مشتمل ایک فوجی کمپاؤنڈ، دو بجلی گھر اور ایندھن ذخیرہ کرنے کی جگہ شامل تھی۔ فوج کے مطابق یہ کارروائی حوثیوں کی جانب سے اسرائیلی شہریوں پر حالیہ میزائل اور ڈرون حملوں کے جواب میں کی گئی۔

جمعے کے روز حوثیوں نے کہا تھا کہ انہوں نے اسرائیل کی جانب بیلسٹک میزائل داغا جو غزہ میں فلسطینیوں کے ساتھ اظہارِ یکجہتی کے لیے تھا۔ ایک اسرائیلی فضائیہ کے افسر نے دعویٰ کیا کہ یہ پہلا موقع ہے جب یمن سے ایسا میزائل فائر کیا گیا جو ممکنہ طور پر کئی سب-مونی شنز لے کر آیا تھا تاکہ اثر کے وقت پھٹ سکے۔

اکتوبر 2023 میں غزہ میں اسرائیل اور حماس کے درمیان جنگ شروع ہونے کے بعد سے ایران نواز حوثی عسکریت پسند ریڈ سی میں جہازوں کو نشانہ بنا رہے ہیں اور وقتاً فوقتاً اسرائیل پر بھی میزائل داغتے رہے ہیں جن میں سے اکثر کو اسرائیلی دفاعی نظام نے ناکام بنا دیا۔ جواباً اسرائیل نے یمن کے مختلف حوثی زیرِقبضہ علاقوں بشمول اہم الحدیدہ بندرگاہ پر بھی حملے کیے۔

حوثیوں کے سینئر رہنما عبدالقادر المرتضیٰ نے اتوار کو کہا کہ ان کا گروہ غزہ کے عوام کے ساتھ اظہارِ یکجہتی کے لیے کارروائیاں جاری رکھے گا۔ انہوں نے کہا کہ ”(اسرائیل) کو یہ جان لینا چاہیے کہ ہم غزہ میں اپنے بھائیوں کو کبھی تنہا نہیں چھوڑیں گے، چاہے اس کی کوئی بھی قیمت کیوں نہ چکانی پڑے۔“

یہ حملے اسرائیل اور حوثیوں کے درمیان ایک سال سے زائد عرصے سے جاری براہِ راست تصادم کی تازہ کڑی ہیں، جو غزہ کی جنگ کے خطے بھر میں پھیلتے اثرات کی عکاسی کرتے ہیں۔