اطلاعات کے مطابق سست رفتار انٹرنیٹ سروسز کی بنیادی وجہ حکومت کی بڑھتی ہوئی مانیٹرنگ اور نگرانی کی کوششیں ہیں، جنہیں حالیہ طوفانی بارشوں اور بڑے پیمانے پر بجلی کی بندش نے مزید متاثر کیا ہے، جس سے ٹیلی کمیونیکیشن سسٹم کا ایک بڑا حصہ متاثر ہوا ہے۔

پاکستان فری لانسرز ایسوسی ایشن کے چیئرمین ابراہیم امین نے کہا کہ ناقص انٹرنیٹ سروسز نے نہ صرف چھوٹے شہروں بلکہ بڑے شہروں جیسے کراچی میں بھی فری لانسرز کو متاثر کیا ہے، جس کی وجہ سے آمدنی اور غیر ملکی کلائنٹس سے نئے پروجیکٹس میں بڑا نقصان ہوا ہے۔

کئی بار فری لانسرز کو 10 سے 15 گھنٹے تک کام سے محروم رہنا پڑتا ہے کیونکہ بارش اور شہری سیلاب سے متاثرہ علاقوں میں طویل بجلی کی بندش اور انٹرنیٹ سروسز معطل رہتی ہیں۔

اسی دوران آئی ٹی ایکسپورٹر اور ہیکسلائز کے سی ای او سعد خان نے کہا کہ آئی ٹی کمپنیاں اکثر ریموٹ ورکرز اور فری لانسر کنسلٹنٹس کو ملازمت دیتی ہیں، جس کا مطلب یہ ہے کہ جب بجلی یا انٹرنیٹ نہ ہو تو ان کے مجموعی آپریشنز اور بزنس سائیکل بری طرح متاثر ہوتے ہیں۔

انہوں نے نشاندہی کی کہ سست رفتار انٹرنیٹ نہ صرف آئی ٹی کمپنیوں اور ان کے غیر ملکی کلائنٹس کے آپریشنز کو متاثر کرتا ہے بلکہ ان تمام شعبوں کو بھی متاثر کرتا ہے جنہوں نے اپنے سسٹمز کو خودکار اور ڈیجیٹل طریقوں پر منتقل کر لیا ہے۔

ان تمام چیلنجز کے باوجود آئی ٹی کمپنیاں اور فری لانسرز گزشتہ مالی سال میں 3.8 ارب ڈالر سے زائد کا زرمبادلہ کما چکے ہیں۔ یہ آمدن آئندہ مالی سال میں 4 ارب ڈالر تک پہنچنے یا کم از کم اس ہدف کو چھونے کی توقع ہے۔

سائبر سیکیورٹی کے خطرات

ایس آئی گلوبل سولوشنز کے سی ای او ڈاکٹر نعمان سعید نے کہا کہ بار بار انٹرنیٹ کی بندش اور سست رفتاری سائبر سیکیورٹی اور خودکار نگرانی کے نظام کو بھی نقصان پہنچاتی ہے۔

انہوں نے تجویز دی کہ متبادل حکمت عملی اپنائی جائے، جیسے کہ آئی ٹی اور ایکسپورٹ پر مبنی کمپنیوں کو ڈیڈیکیٹڈ انٹرنیٹ سہولت فراہم کی جائے، جس کے لیے مؤثر آئی پی وائٹ لسٹنگ اور سیٹلائٹ انٹرنیٹ سروسز کو یقینی بنایا جائے۔

ان کا کہنا تھا کہ حکومت آئی ٹی ایکسپورٹ کے لیے پالیسی اور اہداف تو مقرر کرتی ہے لیکن ان چیلنجز کو مدنظر نہیں رکھتی، جس کے نتیجے میں یہ شعبہ اپنے اہداف حاصل کرنے میں ناکام رہتا ہے۔

پاکستان سافٹ ویئر ایکسپورٹ بورڈ (پی ایس ای بی) کے ساتھ 20 ہزار سے زائد آئی ٹی کمپنیاں رجسٹرڈ ہیں اور ملک میں 23.7 لاکھ سے زائد فری لانسرز کام کر رہے ہیں۔