نور خان ایئربیس پر اسحاق ڈار نے معزز مہمان کا استقبال کیا، جہاں وزارتِ خارجہ اور چینی سفارتخانے کے سینئر حکام بھی موجود تھے۔ اس موقع پر روایتی لباس میں ملبوس بچوں نے چینی وزیر خارجہ کو پھول پیش کیے، جو پاکستان کی ثقافتی مہمان نوازی کی علامت تھا۔

چینی وزیر خارجہ وانگ ای کے تین روزہ دورۂ پاکستان کے دوران چھٹا پاک-چین وزرائے خارجہ اسٹریٹجک ڈائیلاگ اسلام آباد میں منعقد ہوگا، جس کی مشترکہ صدارت نائب وزیر اعظم و وزیر خارجہ اسحاق ڈار اور وانگ ای کریں گے۔

مذاکرات میں سیاسی، اقتصادی اور سیکیورٹی تعاون سمیت دوطرفہ و علاقائی امور پر تفصیلی تبادلہ خیال متوقع ہے۔

وانگ ای کا یہ دورہ وزیر اعظم شہباز شریف کے آئندہ دورۂ چین سے قبل ہو رہا ہے، جہاں وہ رواں ماہ شنگھائی تعاون تنظیم (ایس سی او) کے سربراہی اجلاس میں شرکت کے لیے بیجنگ جائیں گے اور چینی صدر شی جن پنگ سے ملاقات کریں گے۔

اس سے قبل وانگ ای نے کابل میں چھٹے سہ فریقی وزرائے خارجہ ڈائیلاگ میں بھی شرکت کی، جس میں اسحاق ڈار اور افغانستان کے قائم مقام وزیر خارجہ امیر خان متقی بھی شریک تھے۔

اجلاس کے دوران تینوں ممالک نے علاقائی تعاون کو فروغ دینے کے عزم کا اعادہ کیا، خصوصاً چین-پاکستان اقتصادی راہداری (سی پیک) کو افغانستان تک توسیع دینے کے منصوبے پر اتفاق کیا گیا۔

مشترکہ اعلامیے کے مطابق سی پیک کی افغانستان تک توسیع سے افغانستان کے لیے تجارت، ترسیل اور ترقی کے مواقع میں اضافہ ہوگا، جبکہ اسے خطے کی منڈیوں سے مزید مؤثر انداز میں جوڑا جا سکے گا۔

فریقین نے دہشت گردی کے خلاف تعاون، منشیات کی روک تھام، اور صحت، تعلیم، ثقافت و روابط کے شعبوں میں اشتراک عمل کو مزید مضبوط بنانے پر بھی اتفاق کیا ہے۔