ترجمان دفترِ خارجہ نے ہفتہ کو کہا کہ اس دورے کا مقصد پاکستان اور برطانیہ کے تعلقات کو مزید مستحکم بنانا، ڈیجیٹل ٹیکنالوجی، مصنوعی ذہانت اور انٹرپرینیورشپ میں تعاون کو فروغ دینا اور کامن ویلتھ کے ساتھ تعاون کو بڑھانا ہے۔

برطانوی ارکان پارلیمنٹ، کشمیری رہنما اور برطانیہ میں مقیم پاکستانی کمیونٹی کے نمائندے بھی ڈپٹی وزیراعظم/وزیرِ خارجہ سے ملاقات کریں گے۔

پاکستان ہائی کمیشن لندن میں وہ پنجاب لینڈ ریکارڈ اتھارٹی کے پائلٹ پراجیکٹ اور آئی ایم پاس کے ون ونڈو آپریشن کا افتتاح بھی کریں گے۔

انہوں نے کہا کہ میری پہلے سے طے شدہ سرکاری ملاقاتوں کے باعث، جو برطانیہ کی ڈپٹی وزیراعظم اینجلا رینر، کامن ویلتھ کی سیکریٹری جنرل، برطانوی دفترِ خارجہ کے وزیر حمیش فالکنر اور ہاؤس آف کامنز و ہاؤس آف لارڈز کے اراکین کے ساتھ ہیں، میں برطانوی پاکستانی کمیونٹی کے ساتھ طے شدہ ملاقات نہیں کر سکوں گا۔

انہوں نے کہا کہ یہ فیصلہ ان لوگوں کے ساتھ یکجہتی اور احترام کے طور پر کیا گیا ہے جو حالیہ تباہ کن بارشوں اور فلیش فلڈز کے باعث غمزدہ ہیں، تاکہ قومی سطح پر امدادی اور بحالی کی کوششوں پر مکمل توجہ مرکوز رکھی جا سکے۔

اسحاق ڈار نے کہا کہ خیبرپختونخوا اور پاکستان کے شمالی حصوں میں حالیہ بادل پھٹنے اور سیلاب کے باعث ہونے والے جانی نقصان اور تباہی پر وہ گہرے دکھ میں ہیں۔ ہمارے دل اُن خاندانوں کے ساتھ ہیں جنہوں نے اپنے پیارے کھوئے، جو زخمی ہوئے یا جن کے گھر اور روزگار تباہ ہو گئے۔

انہوں نے کہا کہ حکومت پاکستان تمام وسائل بروئے کار لا رہی ہے تاکہ متاثرہ افراد تک پہنچا جا سکے، ریسکیو آپریشنز جاری ہیں اور وفاقی و صوبائی ادارے، مسلح افواج اور مقامی انتظامیہ شب و روز متاثرہ افراد کی مدد کر رہے ہیں۔ وزیراعظم نے ہنگامی اجلاس کی صدارت کی ہے اور حکومت فوری ضروریات کے ساتھ ساتھ طویل المدتی بحالی کے اقدامات پر بھی کام کر رہی ہے۔

اسحاق ڈار نے اپیل کی کہ تمام پاکستانی، خواہ ملک میں ہوں یا بیرون ملک، متاثرہ خاندانوں کو دعاؤں میں یاد رکھیں اور جس طرح ممکن ہو امدادی کاموں میں حصہ ڈالیں۔ انشاء اللہ ہم سب مل کر اس مشکل وقت پر قابو پائیں گے۔

کاپی رائٹ بزنس ریکارڈر، 2025