سپارکو کی پریس ریلیز کے مطابق یہ سیٹلائٹ 31 جولائی 2025 کو چین کے ژیچانگ سیٹلائٹ لانچ سینٹر سے مدار میں بھیجا گیا تھا۔

پریس ریلیز میں بتایا گیا ہے کہ سیٹلائٹ نے گراؤنڈ اسٹیشنز کے ساتھ مستحکم رابطہ قائم کرلیا ہے اور اعلیٰ معیار کی تصاویر کی ترسیل شروع کردی ہے جس سے مختلف قومی شعبوں کے لیے ڈیٹا دستیاب ہو گیا ہے۔

بیان میں کہا گیا ہے کہ یہ سیٹلائٹ اعلیٰ معیار کی تصویری صلاحیتوں کا حامل ہے جو شہری منصوبہ بندی، انفرااسٹرکچر کی ترقی اور علاقائی منصوبہ بندی میں انقلاب برپا کرے گا اور شہری پھیلاؤ و ترقی کے رجحانات کی مؤثر نگرانی میں مدد فراہم کرے گا۔

مزید بتایا گیا کہ سیٹلائٹ قدرتی آفات جیسے سیلاب، لینڈ سلائیڈز اور زلزلوں کے لیے بروقت انتباہات فراہم کر کے نظامِ آفات سے نمٹنے کی استعداد کو بھی مضبوط کرے گا۔

بیان میں یہ بھی کہا گیا کہ یہ سیٹلائٹ فصلوں کے پیٹرنز کی نقشہ سازی اور آبی وسائل کے بہتر انتظام کے ذریعے زرعی پیداوار میں اضافہ کرے گا، جس سے غذائی تحفظ میں مدد ملے گی۔

ساتھ ہی، یہ قومی ترقیاتی منصوبوں جیسے پاکستان-چین اقتصادی راہداری (سی پیک) میں اہم کردار ادا کرے گا، جس سے ٹرانسپورٹ نیٹ ورکس کی نقشہ سازی، جیو ہیزرڈز کی نشاندہی اور وسائل کے مؤثر استعمال میں مدد ملے گی۔

حالیہ مہینوں میں پاکستان نے خلائی تحقیق میں نمایاں پیش رفت کی ہے۔

سال کے آغاز میں چین نے پاکستان کا خود تیار کردہ الیکٹرو-آپٹیکل سیٹلائٹ ای او-1 جیوقوان سیٹلائٹ لانچ سینٹر سے مدار میں بھیجا، جس کا مقصد قدرتی آفات کی پیش گوئی اور وسائل کے مؤثر انتظام کو ممکن بنانا ہے۔

گزشتہ سال نومبر میں سپارکو نے 2028 میں شیڈول چین کے Chang’E 8 مشن کے تحت اپنا چاندی روور بھیجنے کے منصوبے کا اعلان کیا تھا۔