لاہور میں ایف پی سی سی آئی کے زیر اہتمام منعقدہ تقریب سے خطاب کرتے ہوئے انہوں نے کہا کہ حقیقی آزادی قومی خوشحالی کے بغیر ممکن نہیں۔انہوں نے کہا کہ ہم آج یہ عہد کرتے ہیں کہ ایسے فیصلے کریں گے جو پاکستان کو پائیدار معاشی ترقی کی راہ پر گامزن کریں۔عاطف اکرام شیخ نے اس بات پر بھی روشنی ڈالی کہ ملک کے مستقبل کی تعمیر میں کاروباری برادری کا کردار نہایت کلیدی ہے۔

تقریب میں پرچم کشائی اور شجرکاری کے پروگرام شامل تھے۔ نمایاں شخصیات میں ایف پی سی سی آئی کے ریجنل چیئرمین زین افتخار چوہدری، یو بی جی کے پیٹرن اِن چیف ایس ایم تنویر، بریگیڈیئر (ر) نادر میر، اور نائب صدور ذکی اعجاز و طارق محمود جدون شامل تھے۔

صدر ایف پی سی سی آئی نے قوم کو مبارکباد دیتے ہوئے کہا کہ آپریشن بنیان المرصوص کی تاریخی کامیابی کے بعد اس سال کی تقریبات غیرمعمولی اہمیت رکھتی ہیں۔ انہوں نے مسلح افواج کی قربانیوں اور بہادری کو خراجِ تحسین پیش کرتے ہوئے کاروباری برادری کی جانب سے گہری شکرگزاری کا اظہار کیا۔

انہوں نے مزید کہا کہ وزیرِاعظم شہباز شریف اور فیلڈ مارشل سید عاصم منیر کی مؤثر سفارت کاری نے بھارت کے جھوٹے بیانیے کو ناکام بنایا اور عالمی سطح پر پاکستان کا وقار بلند کیا۔ ان کے بقول، قومی دشمنوں کے خلاف فیصلہ کن کامیابی کا سہرا بھی فیلڈ مارشل منیر کی قیادت کے سر جاتا ہے۔

عاطف اکرام شیخ نے نوجوانوں کو بااختیار بنانے کی ضرورت پر زور دیا اور بتایا کہ پاکستان کی 65 فیصد آبادی 30 سال سے کم عمر ہے، جو ملک کے لیے ایک زبردست موقع ہے۔ انہوں نے نوجوانوں اور خواتین میں سرمایہ کاری بڑھانے کی اپیل کرتے ہوئے کہا کہ ان کی صلاحیتوں کو بروئے کار لا کر ایک مضبوط اور خوشحال پاکستان کی بنیاد رکھی جا سکتی ہے۔ انہوں نے کہا کہ پاکستان ہماری شناخت ہے اور ہمارے دل اس کے ساتھ دھڑکتے ہیں۔ تقریب کا اختتام اس اجتماعی عزم کے ساتھ ہوا کہ شرکاء ایک ترقی پسند اور مضبوط پاکستان کے لیے اپنی وابستگی جاری رکھیں گے۔

78ویں یومِ آزادی کی مناسبت سے لاہور میں سوئی ناردرن گیس کے ہیڈ آفس میں پرچم کشائی کی تقریب منعقد ہوئی۔ تقریب کے مہمانِ خصوصی سوئی ناردرن گیس کے منیجنگ ڈائریکٹر عامر طفیل تھے۔

اپنے خطاب میں منیجنگ ڈائریکٹر نے قائداعظم محمد علی جناح اور علامہ اقبال کی بصیرت افروز قیادت کو خراجِ عقیدت پیش کیا جن کی بدولت پاکستان کو آزادی حاصل ہوئی۔انہوں نے پاکستان کی مسلح افواج کی عظیم قربانیوں اور شاندار فتوحات کو بھی سراہا۔

لاہور چیمبر آف کامرس اینڈ انڈسٹری نے پاکستان کا یومِ آزادی شایانِ شان انداز میں منایا جس میں پرچم کشائی اور کیک کاٹنے کی تقریب شامل تھی۔ تقریب کا آغاز تلاوتِ قرآنِ پاک سے ہوا، جس کے بعد قومی ترانہ پڑھا گیا۔

ایل سی سی آئی کے صدر میاں ابوذر شاد، سینئر نائب صدر انجینئر خالد عثمان، نائب صدر شاہد نذیر چوہدری، سابق صدر محمد علی میاں، سابق نائب صدر فہیم الرحمٰن سیگول اور ایگزیکٹو کمیٹی کے ارکان نے مشترکہ طور پر قومی پرچم لہرایا۔کاروباری برادری کے بڑی تعداد میں اراکین بھی اس موقع پر موجود تھے۔ پاکستان کی سلامتی، ترقی اور خوشحالی کے لیے خصوصی دعائیں کی گئیں جبکہ فضا پاکستان زندہ باد اور قائداعظم زندہ باد کے نعروں سے گونج اٹھی۔