صدر آصف علی زرداری، وزیرِاعظم محمد شہباز شریف، چیف آف آرمی اسٹاف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو نے الگ الگ پیغامات میں قوم کو یومِ آزادی کی مبارکباد دی۔

سیاسی اور عسکری قیادت نے کہا کہ یہ دن جرات، اتحاد اور قربانیوں کی یاد دلاتا ہے جن کے نتیجے میں پاکستان معرضِ وجود میں آیا۔ صدر زرداری نے کہا کہ مئی میں بیرونی جارحیت کے مقابلے میں قوم نے اپنی طاقت اور اتحاد کو ثابت کیا۔ ”مارکۂ حق“ اور ”آپریشن بنیان المرصوص“ ہماری غیر متزلزل قومی عزم اور یکجہتی کی مثال ہیں جنہوں نے عوام کے اعتماد کو بحال کیا اور عالمی سطح پر پاکستان کا وقار بڑھایا۔ انہوں نے مقبوضہ جموں و کشمیر کے عوام سے یکجہتی اور ان کے حقِ خودارادیت تک سفارتی، اخلاقی و سیاسی حمایت جاری رکھنے کا عزم کیا۔

وزیرِاعظم شہباز شریف نے مارکۂ حق کو دو قومی نظریے کی تائید قرار دیتے ہوئے شہداء کو خراجِ عقیدت پیش کیا۔ انہوں نے کہا کہ قومی مفادات، بالخصوص آبی وسائل کے تحفظ کے لیے ہم چوکس ہیں اور تمام تنازعات کے پرامن حل کے لیے بھارت کو بھی سنجیدگی دکھانا ہوگی۔ انہوں نے عوامی فلاح کے اقدامات، بجلی نرخوں میں کمی اور معیشت، صنعت و ٹیکنالوجی کے فروغ کے لیے حکومتی کوششوں کا ذکر کیا۔

انٹر سروسز پبلک ریلیشنز (آئی ایس پی آر) کے مطابق یوم آزادی پر مسلح افواج، چیئرمین جوائنٹ چیفس آف اسٹاف کمیٹی اور سروسز چیفس نے قوم کو مبارکباد دی۔

آئی ایس پی آر کے مطابق عسکری قیادت نے کہا کہ پاکستان کی خودمختاری ہر قیمت پر محفوظ رکھی جائے گی، مسلح افواج وطن کے دفاع کے لیے ہر وقت تیار ہیں اور قوم و فوج کا اٹوٹ رشتہ ہماری اجتماعی طاقت کا سرچشمہ ہے۔