ضیاالحق سرحدی نے اتوار کو جاری کردہ بیان میں کہا کہ کراچی پورٹ سے افغان ٹرانزٹ ٹریڈ کا زیادہ تر حصہ دیگر علاقائی ممالک کے بندرگاہوں پر منتقل ہونا کاروباری برادری اور پالیسی سازوں کے لیے تشویش کی بات ہے۔ انہوں نے بتایا کہ پاکستان اور افغانستان کے درمیان دوطرفہ تجارت کا حجم ایک ارب ڈالر سے بھی کم ہو گیا ہے، جبکہ چند سال پہلے یہ دو ارب ڈالر سے زائد تھا۔

انہوں نے بتایا کہ افغانستان اور ایران کے درمیان سالانہ تجارت کا حجم پانچ ارب ڈالر کے قریب پہنچ چکا ہے۔ ایران اور افغانستان کے درمیان خاف-ہیرات ریلوے لائن کے ذریعے روزانہ 100 مال گاڑیاں تجارتی سامان لے کر آتی ہیں، جو ماہانہ تقریباً 40 ہزار ٹن مال کی آمد کا باعث ہے۔

ضیا الحق سرحدی نے سیاسی مسائل کو تجارت سے الگ کرنے پر زور دیا تاکہ سیاسی جھگڑوں کی بنا پر پاک افغان سرحدوں کے بندش سے بچا جا سکے۔ انہوں نے کہا کہ حالیہ عرصے میں تورخم بارڈر ایک ماہ سے زائد عرصے تک بند رہا، جس سے دونوں ممالک کے تاجروں کو بھاری نقصان ہوا اور افغان تاجروں کو متبادل راستوں کی تلاش پر مجبور کیا گیا۔

انہوں نے حکومت سے درخواست کی کہ پاک افغان تجارتی پالیسی کا جائزہ لے کر تجارتی سرگرمیاں جاری اور فروغ دی جائیں تاکہ سرحد پار کے لاکھوں افراد کو فائدہ پہنچے۔