پاکستان کے برعکس، اس قسم کا کوئی بوجھ اس کے کندھوں پر نہیں ہے۔ یہاں امریکی ٹیکنالوجی کمپنیوں پر کوئی پابندی نہیں، نہ ہی مارکیٹ تک رسائی پر رکاوٹ ہے۔ اگرچہ امریکی 19 فیصد محصولات پاکستان کے برآمدی شعبے پر خاموشی سے گزر رہے ہیں، مگر پالیسی سازوں کے لیے اسے نظرانداز کرنا دانشمندی نہیں ہوگی۔ حالانکہ یہ محصولات پہلے تجویز کیے گئے 29 فیصد کی نسبت کم ہیں، مگر پاکستان کے کشمکش میں مبتلا برآمد کنندگان کے لیے 19 فیصد اور 29 فیصد میں فرق محض ایک نظریاتی بات ہے، خاص طور پر ان مصنوعات میں جو 0 سے 8 فیصد کے درمیانے محصولات کے دائرے میں آتی تھیں، جیسے کہ ٹیکسٹائل، سرجیکل سازوسامان اور کھیلوں کا سامان۔ ملک کے برآمد کنندگان، خاص طور پر چھوٹے اور درمیانے درجے کے کاروبار، نہایت کم منافع کی شرح پرچل رہے ہیں۔

ملک میں بڑھتے ہوئے توانائی کے اخراجات اور سیاسی بے یقینی کی وجہ سے کرنسی میں اتار چڑھاؤ، جبکہ ملک ہر ایک برآمدی ڈالر کے لیے جدوجہد کر رہا ہے، یہ صورتحال حوصلہ افزا نہیں ہے۔ یہ یکساں ٹیرف پاکستان کی مسابقت کو نقصان پہنچاتے ہیں، خاص طور پر مزدور پر منحصر اور قیمتوں کے لحاظ سے حساس شعبوں میں جیسے کہ ٹیکسٹائل، سرجیکل آلات، کھیلوں کا سامان اور چمڑے کی مصنوعات۔ یہ شعبے ملک کی معیشت کے محرک ہیں اور روزگار کے مواقع فراہم کرنے میں، خصوصاً پنجاب، خیبر پختونخوا اور سندھ کے پسماندہ علاقوں میں کلیدی کردار ادا کرتے ہیں۔

پاکستان کی تجارتی مسابقت میں کمی، امریکی خریداروں کا رُخ ممکنہ طور پر بنگلہ دیش، اردن، ویت نام یا یہاں تک کہ میکسیکو جیسے ممالک کی جانب موڑ سکتی ہے، وہ ممالک جو آزاد تجارتی معاہدوں (ایف ٹی ایز) یا جی ایس پی پلس اسکیمز کے تحت نسبتاً سازگار شرائط سے فائدہ اٹھا رہے ہیں۔

پاکستان کے ساتھ ایک مستحکم تجارتی تعلق اور اقتصادی استحکام کے لیے حمایت برقرار رکھنے کی غرض سے، ایک متوازن اور دوستانہ ٹیرف 0 سے 5 فیصد کے درمیان ہونا چاہیے، کم از کم اُن ترجیحی برآمدی شعبوں کے لیے جو پاکستان کی معیشت میں ریڑھ کی ہڈی کی حیثیت رکھتے ہیں: جیسے کہ ٹیکسٹائل و ملبوسات، سرجیکل آلات اور طبی سازوسامان، کھیلوں کا سامان، چمڑے کی مصنوعات، اور آئی ٹی خدمات (ڈیجیٹل تجارتی سہولت کاری کے ذریعے)۔

یہ وہی ترجیحی رسائی ہو گی جو امریکہ پہلے ہی کئی ترقی پذیر یا تزویراتی اتحادی ممالک کو فراہم کر رہا ہے۔ امریکہ کے پاس اس مقصد کے لیے کئی پالیسی ذرائع موجود ہیں — خواہ وہ جی ایس پی مراعات کی بحالی ہو یا دوطرفہ اقتصادی فریم ورک کے تحت مخصوص مصنوعات پر مراعات کی گفت و شنید۔

پاکستان ماضی میں سرد جنگ اور دہشت گردی کے خلاف جنگ میں امریکہ کا ایک اہم اتحادی رہا ہے اور حالیہ برسوں میں دونوں ممالک نے علاقائی استحکام کے لیے مشترکہ کوششیں بھی کی ہیں۔ یہ اتحاد صرف سلامتی سے متعلق مکالمے تک محدود نہیں رہنا چاہیے، بلکہ تجارتی پالیسی میں بھی اس کا عکس نظر آنا چاہیے۔

یہ 19 فیصد ٹیرف بظاہر ایک معمول کی تجارتی تبدیلی دکھائی دیتی ہے، لیکن پاکستان کی نازک اقتصادی حالت کے تناظر میں اس کے اثرات نہایت گہرے اور طویل المدت ہو سکتے ہیں۔

سیاسی خیرسگالی، اگر معاشی صورت اختیار نہ کرے، تو جلد ہی غیرمتعلقہ ہو جاتی ہے۔ وقت آ چکا ہے کہ پاکستان متحرک تجارتی سفارت کاری کی راہ اختیار کرے۔

کاپی رائٹ: بزنس ریکارڈر، 2025