ٹروتھ سوشل پر جاری بیان میں صدر ٹرمپ نے کہا ہے کہ بھارت نہ صرف روس سے بڑی مقدار میں تیل خرید رہا ہے بلکہ اس تیل کا بڑا حصہ عالمی منڈی میں بھاری منافع پر فروخت بھی کر رہا ہے۔ اُنہیں اس بات کی کوئی پروا نہیں کہ روسی جنگی مشین یوکرین میں کتنے لوگوں کو مار رہی ہے۔

انہوں نے مزید کہا کہ اسی وجہ سے، میں بھارت کی امریکہ کو ادا کی جانے والی ٹیرف میں نمایاں اضافہ کروں گا۔

ٹرمپ نے یہ واضح نہیں کیا کہ مجوزہ ٹیرف میں اضافہ کس حد تک ہوگا یا کن اشیاء پر لاگو ہوگا۔

بھارت کی وزارتِ تجارت نے اس معاملے پر فوری طور پر کوئی تبصرہ کرنے سے گریز کیا۔

یاد رہے کہ امریکی صدر ڈونلڈ ٹرمپ نے گزشتہ ہفتے اعلان کیا تھا کہ وہ بھارت سے درآمد کی جانے والی اشیاء پر 25 فیصد ٹیرف عائد کریں گے، اور ساتھ ہی دنیا کی پانچویں بڑی معیشت کو ایک غیر متعین ”سزا“ دینے کا عندیہ بھی دیا تھا، تاہم انہوں نے اس سزا کی تفصیلات نہیں بتائیں۔

دوسری جانب، ہفتہ اور اتوار کے دوران بھارتی حکومت کے دو ذرائع نے رائٹرز کو بتایا ہے کہ بھارت، ٹرمپ کی دھمکیوں کے باوجود، روس سے تیل کی خریداری جاری رکھے گا۔

ذرائع نے معاملے کی حساسیت کے پیشِ نظر اپنا نام ظاہر نہ کرنے کی درخواست کی۔